Shokoladli sharcha bilan tayyorlangan pechenyalarni bir bor xonadoningizda tayyorlab ko'rsangiz bormi? Ularni doimiy tayyorlashga odatlanasiz. Sababi bunday pechenyalarni tayyorlagan zaxotingiz ular birzumda g'oyib bo'lib qolaveradi. Oddiy bo'lishiga qaramay ajoyib va juda ham mazali pechenyalar sizga va yaqinlaringizga juda ham ma'qul bo'ladi.
Kerakli masalliqlar:
- shokolad strujkasi
- 2 stakan un
- 2 dona tuxum sarig'i
- 100 gramm shakar kukuni
- 200 gramm saryog'
Glazur uchun:
- 1 dona tuxum oqi
- 200 gramm shakar kukuni
Shokoladli sharchalar uchun:
* 250 gramm achchiq shokolad
* 400 gramm shakar kukuni
* 0,5 osh qoshiq asal
* 100 gramm quyultirilgan sut
* 1 choy qoshiq vanilin shakari
* 2 osh qoshiq saryog'
Tayyorlash usuli:
1. Birinchi navbatda shokoladli sharchalarni tayyorlab oling. Buning uchun: shokoladni bo'laklarga bo'ling va suv xammomida eriting. Saryog'ni yumshating. Tog'orachada asal, quyultirilgan sut, shokolad, oddiy va vanilin shakarini birlashtiring. Saryog'ni qo'shing. Tog'oracha ustini yoping va kamida 3 soatga xona haroratida qoldiring.
2. Belgilangan vaqt o'tib, shokoladli massadan kichik sharchalar shakllantiring va 1 soatga chetda qoldiring.
3. Bu vaqt mobaynida xamirni tayyorlang. Xona haroratida yumshatilgan saryog'ni shakar bilan aralashtiring. Tuxum sarig'ini qo'shing va oz-ozdan unni soling. Bir xil konsistensiyada xamir qoring. Xamirni un sepilgan stol ustida yupqa qilib yoying. Xamirdan 6 sm hajmda, yumaloq shakllar kesib oling.
4. Kesib olingan shakllarni pergament qog'ozi yozib, yog' bilan surtilgan qolipga terib chiqing. 180 darajada qizdirilgan pechda, 15 daqiqa davomida pishirib oling. So'ng, sovuting va qog'ozdan ajratib oling.
5. Glazur uchun: tuxum oqini yengil ko'pirtiring va oz-ozdan shakar kukunini qo'shishni boshlang. Stol ustiga solingan pergament qog'ozi ustida glazurni yupqa qilib yoying. 5 sm hajmda, shakllar kesib oling. Har bir pechenya ustiga glazur, shokoladli sharchadan terib, shakar kukuni va shokolad strujkasi bilan bezating.
6. Nozik va mazali pechenyalar tayyor!
Yoqimli ishtaxa!
