Bugun sizlarga butun dunyoga mashhur va barcha uchun sevimli "Sezar" salati retseptini taqdim etaman. Ushbu salatni tayyorlamagan bekaning o'zi bo'lmasa kerak. Ushbu retsept bo'yicha yana bir bor tayyorlab ko'ring!
Kerakli masalliqlar:
- 50 gramm aysberg salat bargi
- 70 gramm tovuq go'shti
- 20 gramm qora non
- 10 gramm qattiq pishloq
- 1 dona tuxum
- 1 dona pomidor cherri
- o'simlik yog'i qovurish uchun
- ta'bga ko'ra tuz va murch
Sous uchun:
- 90 gramm mayonez
- 0,5 choy qoshiq shakar
- 25 gramm parmezan pishlog'i
- 2-3 tomchi kunjut yog'i
- 1 osh qoshiq limon sharbati
- 1 dona sarimsoq tishchasi
Tayyorlash usuli:
1. Ushbu salatning bor siri sousda. Sousni to'g'ri tayyorlasangiz salat bir umr esda qolarli ta'asurot qoldirishi turgan gap. Sous uchun: mayonezga limon sharbati, qirg'ichning kichik tomonidan chiqarilgan sarimsoq, 1 grammdan paprika va achchiq chili kukunini aralashtiring. So'ng, shakar, qirg'ichdan chiqarilgan parmezan, kunjut yog'ini birlashtiring va blender yordamida, bir xil massa holigacha aralashtiring.
2. Non bo'lagini chet qismlarini kesib tashlang. 1x1 sm hajmda, to'rtburchak shaklda kesing.
3. Quruq, qizigan tovaga soling. So'ng, o'simlik yog'i va qirg'ichdan chiqarilgan sarimsoq solib, aralashtirib, qovuring.
4. Tovuq go'shtini ortiqcha chiqindilaridan tozalang. Katta bo'lmagan bo'laklarga bo'ling. Go'shtga tuz va murch seping. Qirg'ichdan chiqarilgan sarimsoq bilan marinadlang. 10-15 daqiqadan so'ng, tovada, qizdirilgan yog'da, tilla tusga kirgunga qadar qovuring.
5. Aysberg salat bargini yuving va quriting. Qo'lingizda katta bo'laklarga bo'ling.
6. Salat bargiga tayyorlangan sousdan bir qism solib, aralashtiring.
7. Tayyor tovuq go'shtini parrak qilib kesing.
8. Pishirilgan tuxumni 4 qismga bo'ling.
9. Salat tortiladigan laganga sousga cho'mgan salat bargini soling, qirg'ichdan chiqarilgan, parmezan pishlog'idan seping.
10. Tovuq go'shti, tuxum va non bo'laklarini bezagan tarzda terib chiqing. Cherri pomidorini qo'ying. Salat tayyor!
Yoqimli ishtaxa!
