Qizil dengiz salati- oddiy va juda mazali salat. Ushbu taomning g'aroyib nomlanishi uning tarkibiga kiritilgan deyarli barcha masalliqlarning qizil rangga ega bo'lishiga bog'liq. Vaqtingiz ziqligida ushbu salat o'zining tez tayyorlanishi, natijada esa juda ham mazali va to'yimliligi bilan sizni lol qoldiradi. Yaqinlaringizga ham hushkayfiyat ulashuvchi salatni albatta sinab ko'ring!
Kerakli masalliqlar:
- 200 gramm qisqichbaqa tayoqchasi
- 1-2 dona pomidor
- 4 dona tuxum
- 150 gramm qattiq pishloq
- 1-2 dona sarimsoq tishchasi
- Mayonez
- Tuz, murch (ta'bga ko'ra)
Tayyolash bosqichi:
1. Tuxumni suvda, butunlay tayyor bo'lgunga qadar pishiring. So'ng, tozalang va yupqa, somoncha shaklda to'rg'ang.
2. Pomidorni yuving va tag qismini ajrating. Qoshiq yordamida ichki, yumshoq qismini ajrating va somoncha shaklda kesing.
3. Mazali pishloqni esa qirg'ichning katta tomonidan chiqaring.
4. Qisqichbaqa tayoqchalarini qadog'idan ajrating va qolgan masalliqlar kabi somoncha qilib to'rg'ang.
5. Ana endi salatga yanada hushta'mlik bag'ishlovchi mayonezli sousni tayyorlang. Sarimsoq donachalarini maxsus pressdan chiqaring. Mayonezga sarimsoq donachalari, tuz va murchni soling va aralashtiring.
6. Kutilgan daqiqalar ham yetib keldi. Salatni yig'ishni boshlashga kirishing. Salat tayyorlanadigan idishga tayyorlangan barcha masalliqlarni soling, mayonezli sousni soling va extiyotkorlik bilan aralashtiring. Salatni ko'kat shoxchalari bilan bezating. Mazali salat tayyor!
Yoqimli ishtaxa!
ESLATMA!
Salatga qo'shimcha sifatida qizil-shirin bulg'oq qalampiridan solishingiz ham mumkin. Biroq, bulg'or qalampiri hajmi pomidor bilan bir xil bo'lishi lozim.
Qisqichbaqa tayoqchalarini esa tuzlangan qizil baliq bilan almashtirish mumkin. Biroq, yodingizda bo'lsin! Salatning ta'mi o'zgarishi turgan gap.
Masalliqlarni bir xil shaklda to'rg'ang. Shundagina salat o'zgacha ishtaxa ochar ko'rinishga ega bo'ladi.
Mayonezni har qanday qo'shimchalarsiz yogurt bilan almashtirishingiz mumkin.
