E'tiboringizga noan'anaviy usulda tayyorlangan mazali omlet retseptini taqdim etamiz. Ertalabki nonushta uchun ajoyib tanlov. Dasturxon davrasida yaqinlaringizni lol qoldirishning vaqti keldi. Tez tayyorlanish bilan birga juda ham mazali. Kerakli masalliqlarhar bir xonadonning muzlatkichida mavjud.
Kerakli masalliqlar:
3 dona tuxum
50 gramm sut
15 gramm zaytun yog'i
15 gramm bodring, pomidor
8 gramm salat bargi
150 gramm piyoz
50 gramm shakar
200 ml suv
1 dona gvozdika ziravori
40 gramm o'simlik yog'i
20 gramm saryog'
1 gramm tuz, dolchin (koritsa)
Tayyorlash usuli:
1. Birinchi navbatda karamellangan piyozni tayyorlang! Buning uchun: tozalangan piyozni o'rtacha qalinlikda, somoncha shaklda to'rg'ang. Qizdirilgan saryog' va o'simlik yog'i aralashmasida qovuring.
2. Shakar va suvni quying. 5-7 daqiqadan so'ng qolgan ziravorlarni soling.
3. Tayyorlanayotgan massa karameltusga kirgunga qadar tayyorlang. Aralashtirishni unutmang!
4. Tuxumni sut va tuz bilan aralashtiring.
5. Zaytun yog'i quyib, qizdirilgan tovaga tuxumli massani quying va qovuring.
6. Tayyor omletni qolip yordamida kesib oling. Laganga avval omlet bo'lagini so'ng karamellangan piyoz, omlet bo'lagi, shu ketma-ketlikda soling. Omletni sabzavotlardan tayyorlangan salat bilan dasturxonga torting.
Yoqimli ishtaxa!
Yodda tuting! Ushbu taom juda ham mazali. Bir bor tayyorlashingiz bilanoq, qayta-qayta tayyorlashga odatlanasiz. ushbu omlet retsepti taomnomadan o'rin olishi turgan gap.
