Sizning e'tiboringizga mazali, issiqqina choy bilan tanovul qilinadigan pechenyalar retseptini taqdim etamiz. ushbu pishiriqning nafaqat ko'rinishi balki, mazasi ham sizni hayratga solinishi aniq. Ushbu pechenyalarni albatta tayyorlang va oila a'zolaringiz davrasida miriqib tanovul qiling.
Kerakli masalliqlar:
250 gramm un
170 gramm saryog'
50 gramm shakar
2 dona tuxum sarig'i
1 osh qoshiq ko'k choyning matcha turi
1 choy qoshiq vanilin kukuni
bir chimdim tuz
Tayyorlash usuli:
1. Xona haroratida yumshatilgan saryog'ni mikser yordamida yengil massa hosil bo'lguncha ko'pirtiring.
2. Shakar, tuxum sariqlari va vanilin kukunini qo'shib, ko'pirtirishda davom eting.
3. Saryog'li massaga un va bir chimdim tuz soling va yumshoq, qo'lga yopishadigan xamir qoring.
4. Xamirni teng ikki qismga bo'ling. Xamirning bir qismiga ko'k choyni qo'shing. Agar siz ko'k choyning ushbu turini topa olmasangiz u holda oziq-ovqat uchun rangning yashil rangidan qo'shing.
5. Tayyorlangan xamir zuvalalarini yana ikki qismga bo'ling va uzunchoq, kolbasasimon shakllar yoying.
6. Gaz pechini 180 darajada qizdiring. Stol ustiga pergament qog'ozini yozing. Pergament qog'ozi chetidan xamirlarni quyidagicha terib chiqing. To'rtburchak shaklda birinchi oq yonidan yashil rangdagi xamirni qo'ying. Oq xamir ustidan yashil xamirni, yashil xamir ustiga oq xamirni qo'ying. Tayyor xamir shaklini pergament qog'oziga o'rab, 1 soatga muzlatgichga qo'ying.
7. Vaqt o'tgandan so'ng, xamirni olib, 1,5 sm qalinlikda kesib chiqing.
8. Kesib chiqilgan xamirlarni pergament qog'ozi yozilgan pishirish qolipiga tering va 15-20 daqiqa davomida pishiring. Pechenyalar usti och tilla rangga kirishi lozim.
9. Pishib chiqgan pechenyalarni sovuting va dasturxonga torting.
Yoqimli ishtaxa!
