Oila aʼzolaringizni mazali va asosiysi foydali taom bilan siylashni istasangiz, unda ushbu taomni albatta tayyorlang. Bu taom qishda ham, yozda ham sevib isteʼmol qilinadi. Pomidor sousi va hushbo'y ko'katlar qo'shib tayyorlangan ushbu taom Gruzin xalqining sevimli taomlaridan biri hisoblanadi. Ushbu taomni tushlik, kechki ovqat va hattoki mexmonlar uchun tayyorlasangiz ham barchaga juda ham manzur bo'ladi.
Kerakli masalliqlar:
1,5 kg tovuq tana go'shti
3 dona o'rtacha hajmda piyoz
2 -3 dona sarimsoq donachasi
1 bog'dan kashnuch va petrushka ko'kati
4 dona pomidor
Tuz, murch, ziravorlar aralashmasi
2 osh qoshiq saryog'
2 osh qoshiq gruzin sousi Tkemali
Tayyorlash usuli:
1. Tovuq go'shtini yuving va bir xil katta bo'lmagan bo'laklarga bo'lib chiqing.
2. Piyozni tozalang va mayda qilib to'rg'ang.
3. Pomidor po'stini ajrating va o'rtacha hajmda to'rg'ang.
4. Ko'katlar va sarimsoq donachalarini maydalang.
5. Tovuq go'shtini tovada qizdirilgan yog'da, baland olovda, barcha tomonlari qizarguncha qovuring.
6. So'ng, saryog', piyoz, tuz, murch, ta'bga ko'ra ziravorlar va pomidorni solib aralashtiring. Tova qopqog'ini yopib, past olovda 20 daqiqa dimlang.
7. So'nggi qadam : 2 osh qoshiq gruzin sousi Tkemali va maydalangan ko'katlar, sarimsoqni qo'shing, aralashtiring. Olovdan olib, 10 - 15 daqiqa dam bering.
8. Tayyor pomidor sousida dimlangan tovuqni kartoshka, guruch, grechkadan tayyorlangan garnirlar bilan dasturxonga torting.
Yoqimli ishtaxa!