Сәтләүектәр аҡһым, май, төрлө витаминдарға, минералдарға бай, әммә һәр нимәлә сама белергә кәрәк. Улар, ғәҙәттә, калориялы, шуға артыҡ тән ауырлығы менән йонсоғандарға уларҙы көнөнә бер нисә бөртөк кенә ашарға кәңәш ителә. Был бауырға, аш һеңдереү ағзаларына ауырлыҡ килтермәҫ һәм артыҡ килограмдар йыймаҫ өсөн кәрәк. Өс йәшкә тиклемге балаларға ла сәтләүек бирергә ярамай, сөнки ул – аллерген аҙыҡ-түлек. Әгәр балала сәскә атҡан ағастарға, помидорға аллергия бар икән, сәтләүектәрҙе ете йәшкә тиклем ашамау йәки аҙыҡ-түлеккә аллергендарҙы асыҡлау өсөн анализ тапшырып тикшертеү хәйерлерәк. Псориаз, нейродермит, атопик дерматит кеүек тән сирҙәре менән йонсоғандарға ла сәтләүек ашағанда һаҡ булырға кәңәш ителә. Берҙән-бер иҫкәрмә: баҙамды (миндаль) ашарға мөмкин, әммә уны ла самалап ҡулланырға кәрәк. Беләһеңме? Сәтләүектәрҙең калориялығы (100 грамда): грек сәтләүеге — 850 килокалория; фундук — 700 килокалория, баҙам — 600 килокалория; кешью — 600 килокалория; фисташка — 550 килокалория. Фото: nutstime.ru
