Mevalar ichida olma mevasi vitaminlarga boy va foydali elementlarga ega mevadir. Har qanday usulda tayyorlangan ushbu meva hech kimning e'tiboridan chetda qolmay barcha uchun ma'qul bo'ladi. Taqdim etiladigan retseptlar siz uchun ma'qul bo'lib, tayyorlanishida hech qanday qiyinchilik tug'dirmaydi.
Olmadan tayyorlangan pyure
Ushbu usulda tayyorlangan olma pyuresini sous sifatida, bo'tqalarga qo'shimcha sifatida va boshqa taomlar uchun qo'shimcha sifatida foydalanishingiz mumkin.
Kerakli masalliqlar:
1 kg olma
200 gramm shakar
1 choy qoshiq limon sharbati
Tayyorlash usuli:
1. Olma mevasini tozalang va bir necha bo'laklarga bo'ling. Ozgina suv quyilgan kastryulkaga mevalarni soling, limon sharbatini quying.
2. Past olovda, qopqoq ostida, mevalar yumshoq holga kelgunga qadar pishiring. So'ng, sitodan o'tkazing. Olma pyuresiga shakarni soling, aralashtiring. Qaytadan qaynash darajasiga olib boring.
3. Tayyor olma pyuresini sterillangan bankalarga soling. Qishki g'amlamalaringiz qatoriga qo'shing.
Olma mevasidan vitaminlarga boy kompot
Ushbu usulda tayyorlangan kompot sotuvdagi sharbatlarga qaraganda vitaminlarga boy va tabiiydir. Tayyorlanishi hech qanday qiyinchilik tug'dirmaydigan ushbu retseptni albatta tayyorlang!
Kerakli masalliqlar:
1 kg olma
200 gramm shakar
1 litr suv
Tayyorlash usuli:
1. Olmalarni tozalang, bir necha bo'laklarga bo'ling va yuving.
2. Kompot uchun bankalarni sterillang. Olma bo'laklarini soling. Olma mevasi bankaning yarim qismini egallashi lozim.
3. Shakarli sharbatni tayyorlashga kirishing. Shakar va suvni birlashtiring. 10 daqiqa davomida qaynating. So'ng, olmalar ustidan quying.
4. Banka qopqoqlarini yoping. Qopqoqlarni pastga qaratgan holda bankalarni terib chiqing va qorong'u joyda butunlay sovutishga qoldiring.
5. Belgilangan vaqt o'tib, kompotlarni qishki g'amlamalaringiz qatoriga terib qo'ying.
Marinadlangan olma
Ushbu usulda tayyorlangan olma mevasini gazak va go'shtli taomlarga garnir sifatida dasturxonga tortsangiz, ishoning dasturxon davrasida barchani lol qoldirishi turgan gap. Bunday olmani o'z holicha tanavvul qilsangiz ham ko'nglingizga manzur bo'lishi aniq.
Kerakli masalliqlar:
1 kg olma
0,5 litr suv
200 gramm shakar
200 ml 9 % sirka
Ta'bga ko'ra tuz, bir chimdim dolchin
30 dona gvozdika va qora butun qalampir ziravori
Tayyorlash usuli:
1. Olmalarni yuving. Sterillangan bankaga soling.
2. Barcha masalliqlarni - suv, shakar, sirka,tuz, dolchin, gvozdika, qalampirni birlashtiring, aralashtiring. Sovuq marinadni olmalar ustidan quying. Qaynatilgan suvda bankalarni isitishga qo'ying. Bu jarayonni diqqat bilan kuzating! Ushbu jarayonda suv hech ham qaynamasligi lozim. 1 litr hajdagi bankani 15 daqiqa, 3 litr hajmdagi bankani esa 30 daqiqa davomida isiting.
3. Bu jarayondan so'ng, qopqoqlarini yoping. Sovuq suvda sovuting. Issiq marinad ichidagi olma juda ham yumshoq tayyor bo'lmasligi uchun.
4. Sovutilgandan so'ng, marinadlangan olmalarni qishki g'amlamalaringiz qatoriga terib qo'ying.
