Kechki taom dasturxoniga qanday taom tayyorlashga boshingiz qotdimi? O'ylanishning hech ham hojati yo'q. Bugun biz sizlarga ajoyib va tez tayyorlanadigan mazali kabob retseptini taqdim etamiz. Bu taomni albatta tayyorlang va yaqinlaringizni hayratda qoldiring.
Kerakli masalliqlar:
350 gramm qo'y go'shti
100 gramm qo'y go'shti yog'i
1 dona qizil piyoz
2 dona mayda piyoz
10 gramm kashnuch ko'kati
2 gramm zira va qurigan rayhon ko'kati
Ta'bga ko'ra tuz va murch
Salat uchun:
1 dona pomidor
2 dona o'rtacha bodring
Ta'bga ko'ra ko'katlar
120 gramm yogurt
Zaytun yog'i
Yalpiz shoxchasi
Tayyorlash usuli:
1. Eng avvalo kabob uchun kerakli masalliqlarni tayyorlab oling. Go'shtni va go'sht yog'ini bo'laklarga bo'ling. Qizil piyoz yarmini va oddiy piyozni maydalab to'rg'ang. Qizil piyoz yarmini yarim halqa shaklida to'rg'ab, sovuq suvda uyuting (salat uchun).
2. Go'shtni ikki o'tkir pichoq yordamida yoki oshxona chopqisi yordamida qiymalang. Qiymalangan go'sht, yog', mayda to'rg'algan kashnuch, quritilgan rayhon, to'rg'algan piyoz, tuz va murch barchasini birlashtiring. Yana bir bor pichoq bilan uring va aralashtiring.
3. Tayyor go'sht qiymasini yumaloqlab, oshxona taxtachasiga bir necha bor uring.
4. Go'sht qiymasini 6 qismga bo'ling va yumaloqlang. Yumaloqlangan qiymasidan birma-bir olib, yog'och shishlarga o'rang, qo'lingizni sovuq suv bilan namlang. Tayyor kaboblarni 1 soatga muzlatgichga qo'ying.
5. Bu vaqt mobaynida pomidor va bodringni yuving. Salat uchun uncha katta bo'lmagan bo'laklarda to'rg'ang. Yogurtga yalpiz shoxchasini maydalab soling va tuz qo'shing.
6. Gaz pechini 160 darajada qizdiring. Gril tovasini yog' bilan surting va qizdiring (gril tovasi bo'lmagan holda oddiy tovadan foydalanish ham mumkin). Kaboblarni ikki tomonini qizartirib qovuring. So'ng, 5 daqiqaga gaz pechida pishiring.
7. Tayyor kaboblarni dasturxonga tortish uchun tayyorlagan idishingizga tering. Bir chetiga to'rg'algan pomidor, qizil piyoz, bodringni qo'ying, ko'kat barglari bilan bezang. Bir chetiga yalpiz bilan tayyorlangan sousni qo'ying. Birzumda mazali kabob tayyor!
Yoqimli ishtaxa!
