Բաքվի «ոչ կոռեկտ» մեկնաբանություններից հետո Ադրբեջանի դեսպանը հանդիպել է ՌԴ ԱԳՆ փոխնախարարը հետ, հայտնում է ՌԴ ԱԳՆ-ն։
ՌԴ ԱԳ փոխնախարար Անդրեյ Ռուդենկոյի և Փոլադ Բյուլբյուլօղլուի հանդիպման ժամանակ ռուսական կողմը վերահաստատել է «Լաչինի միջանցքի ամբողջական և անհապաղ ապաշրջափակման, դրա երկայնքով երկու ուղղություններով տրանսպորտային կապերի վերականգնման անհրաժեշտությունը՝ համաձայն 2020 թ․ նոյեմբերի 9-ի եռակողմ հայտարարության, ինչպես նաև Լեռնային Ղարաբաղի բնականոն կենսաապահովման համար պայմանների ստեղծումը»։
Ռուդենկոն ասել է, որ ռուսական կողմը պատրաստ է Մոսկվայում կազմակերպել արտաքին գործերի նախարարների եռակողմ հանդիպում՝ քննարկելու ամենաբարձր մակարդակով պայմանավորվածությունների իրականացման ուղիները՝ ներառյալ խաղաղության պայմանագրի շուրջ համաձայնությունը, որին կհաջորդի Ռուսաստանի, Ադրբեջանի և Հայաստանի ղեկավարների գագաթնաժողովը Մոսկվայում խաղաղության պայմանագրի ստորագրման համար։
Հուլիսի 16-ին Բաքուն տարակուսանք և հիասթափություն էր հայտնել ՌԴ ԱԳՆ-ի՝ ԼՂ-ի վերաբերյալ հայտարարության առնչությամբ։ Ադրբեջանի ԱԳՆ հայտարարության համաձայն՝ ՌԴ ԱԳՆ հայտարարությունը «չի համապատասխանում Ադրբեջանի և Ռուսաստանի Դաշնության միջև փոխադարձ համագործակցության մասին հռչակագրին և ՌԴ նախագահ Վլադիմիր Պուտինի ելույթներին՝ Ադրբեջանի, այդ թվում՝ ղարաբաղյան տարածաշրջանի տարածքային ամբողջականության և ինքնիշխանության աջակցությանը»:
Ավելի վաղ ՌԴ ԱԳՆ-ն հայտարարել էր, որ Հայաստանի կողմից Լեռնային Ղարաբաղի ճանաչումը որպես Ադրբեջանի տարածքի մաս «արմատապես փոխել է այն հիմնարար պայմանները», որոնց ներքո ստորագրվել է 2020 թվականի նոյեմբերի 9-ի հայտարարությունը։ «2022 թվականի հոկտեմբերին և 2023 թվականի մայիսին Եվրամիության հովանու ներքո անցկացվող գագաթաժողովներում Հայաստանը Լեռնային Ղարաբաղը ճանաչել է Ադրբեջանի տարածքի մաս։ Մենք հարգանքով ենք վերաբերվում Հայաստանի ղեկավարության ինքնիշխան որոշմանը, սակայն դա արմատապես փոխել է այն հիմնարար պայմանները, որոնց ներքո ստորագրվել է Ռուսաստանի, Հայաստանի և Ադրբեջանի ղեկավարների 2020 թ․ նոյեմբերի 9-ի հայտարարությունը, ինչպես նաև տարածաշրջանում տեղակայված ռուսական խաղաղապահ զորակազմի իրավիճակը»,- ասված էր հայտարարության մեջ։
ՌԴ ԱԳՆ դիրքորոշմամբ՝ «այս պայմաններում պետք չէ Ղարաբաղի հայ բնակչության ճակատագրի պատասխանատվությունը բարդել երրորդ երկրների վրա, պետք է անհապաղ սկսել Երևանի և Բաքվի միջև խաղաղության պայմանագրի նախապատրաստումը՝ հենվելով ավելի վաղ ձեռք բերված պայմանավորվածությունների վրա»։ Նշվել էր, որ այս պայմանագրի մաս պետք է դառնան «Ղարաբաղի հայության իրավունքների ու անվտանգության հուսալի և հստակ երաշխիքները, ինչպես նաև եռակողմ պայմանավորվածությունների ամբողջական կատարումը, որոնց թվում նաև հաղորդակցությունների ապաշրջափակման և սահմանազատման գործարկումն է»։
Մտահոգիչ համարելով Լեռնային Ղարաբաղի շուրջ իրավիճակը՝ ՌԴ ԱԳՆ-ն Բաքվին կոչ էր արել անհապաղ միջոցներ ձեռնարկել Լաչինի միջանցքի անհապաղ ապաշրջափակման, ինչպես նաև տարածաշրջանի էներգամատակարարման համար:
