Եվրախորհրդի ղեկավար Շառլ Միշելը հայտարարել է, որ Ադրբեջանի նախագահ Իլհամ Ալիևի հետ վերջերս կայացած զրույցի ընթացքում նշել է, որ նա չի կարող տարածքային պահանջներ ունենալ Հայաստանի նկատմամբ, հայտնում է TACC-ը։
«Ես երկու օր առաջ խոսել եմ նախագահ Ալիևի հետ։ Նրան հստակ ասել եմ, որ չի կարող տարածքային պահանջներ ունենալ Հայաստանի նկատմամբ։ Ասել եմ, որ պետք է բարձրաձայն ասվի, որ կա Հայաստանի և Ադրբեջանի տարածքային ամբողջականության փոխադարձ ճանաչում, և որ պետք է երաշխավորել դա»,- հայտարարել է Միշելը։
Նա չի մեկնաբանել Ալիևի՝ Գրանադայի հանդիպմանը չգնալու որոշումը։
Իր հերթին ԵՄ դիվանագիտության ղեկավար Ժոզեպ Բորելը հույս է հայտնել, որ Բրյուսելում հնարավոր կլինի բանակցություններ կազմակերպել Ադրբեջանի և Հայաստանի ղեկավարների միջև։
«Հուսով եմ, որ Բրյուսելում հնարավոր կլինի հանդիպումներ կազմակերպել Հայաստանի և Ադրբեջանի միջև։ Սա անհրաժեշտ է, որպեսզի հակամարտությունը չընդլայնվի։ Բացի այդ, Հայաստանում անհրաժեշտ է հասնել քաղաքական կայունացման»,- ասել է նա Գրանադայում լրագրողներին։
Նա ափսոսանք է հայտնել, որ Ադրբեջանի և Թուրքիայի նախագահները չեն մասնակցել Գրանադայում Եվրոպական քաղաքական համայնքի գագաթնաժողովին։
Հոկտեմբերի 4-ին Ազգային ժողովում ՀՀ վարչապետ Նիկոլ Փաշինյանը հայտարարել էր, որ Գրանադայում պետք է շրջադարձային փաստաթուղթ ստորագրվեր, բայց Ալիևի հետ հանդիպումը չեղարկվել է։
Հոկտեմբերի 4-ին հայտնի էր դարձել, որ Ալիևը Երևան-Փարիզ պայմանագրի պատճառով չի մեկնի Գրանադա՝ Փաշինյանի հետ հանդիպման: Սեպտեմբերի 24-ին հայտնել էինք, որ հոկտեմբերի 5-ին Գրանադայում կհանդիպեն ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը։
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ, որի հետևանքով՝ վերջին տվյալներով՝ կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։ Արցախից բռնի տեղահանվել ու Հայաստան է տեղափոխվել 100 514 անձ, հաշվառվել է 85 975 անձ (86%-ը)։ Սեպտեմբերի 29-ին Արցախի ՆԳՆ-ի տվյալներով, փրկարարները աղետի տարածքից 170 աճյուն և մասունք են հայտնաբերել:
