"Мәҙәниәт" милли проектының "Ижади кешеләр" программаһын тормошҡа ашырыу сиктәрендә Өфөлә "Театраль Өфө" Республика балалар һәм йәштәр театрҙары фестивале үтте.
Башҡортостан Республикаһының Мәҙәниәт министрлығы, Республика халыҡ ижады үҙәге ойошторған фестиваль республиканың балалар һәм йәштәр театрҙарына ярҙам итеүгә, һәүәҫкәр театр сәнғәтен пропагандалауға һәм артабан үҫтереүгә, балалар һәм йәштәр араһында театр сәнғәтен үҫтереү өсөн шарттар булдырыуға, рухи мәҙәниәт һәм театр сәнғәте саралары ярҙамында илдең тарихи һәм мәҙәни мираҫына һаҡсыл ҡараш булдырыуға йүнәлтелгән.
"Фестивалдең йылдан-йыл географияһын киңәйтеүе ҡыуаныслы. Быйыл беҙҙең фестивалгә Луганск халыҡ республикаһынан абруйлы ҡунаҡ – Луганск халыҡ ижады үҙәгенең Аматор сәнғәтенең халыҡ ижады һәм традицион жанрҙары бүлеге методисы Наталья Тютюнник килде. Фестиваль программаһы бай булды. Режиссерҙар һәм театр коллективтары етәкселәре Республиканың һәүәҫкәр театр ижадын үҫтереү проблемаларына арналған семинар-практикумда һәм түңәрәк өҫтәлдә ҡатнашты. Сара сиктәрендә профессор, Рәсәйҙең һәм Башҡортостандың халыҡ артисы Таңсулпан Бабичева менән осрашыу һәм уның “Ваҡыт көҙгөһө”ндә автобиографик китабының исем туйы үтте, - тип билдәләне Республика халыҡ ижады үҙәгенең әйҙәүсе белгесе Эльвира Дәүләтбирҙина.
Өс көнлөк театр марафоны сиктәрендә Өфө, Салауат, Белорет ҡалаларынан, Бәләбәй, Ҡырмыҫҡалы, Туймазы райондарынан 12 спектакль күрһәтелде. Фестиваль спектаклдәрен театр белгесе, Башҡортостандың атҡаҙанған сәнғәт эшмәкәре Динә Дәүләтшина, Салауат дәүләт башҡорт драма театрының баш режиссеры Лиана Ниғмәтуллина, Заһир Исмәғилев исемендәге Өфө дәүләт сәнғәт институтының театр факультеты деканы Рәмзис Зәйҙуллин, Заһир Исмәғилев исемендәге Өфө дәүләт сәнғәт институтының актер оҫталығы һәм режиссура кафедраһы педагогы , Башҡортостан Республикаһының атҡаҙанған сәнғәт эшмәкәре Борис Ларионов, Рәсәй халыҡ ижады үҙәге методисы Лидия Перлова һәм Луганск Халыҡ ижады үҙәгенең театр жанры буйынса белгесе Наталья Тютюнник баһаланы.
"Урал Батыр" спектакле өсөн ҡала Мәҙәниәт һарайының "Ирәмәл" башҡорт халыҡ театры (етәксеһе – Гөлнара Ғилманова) гран-приға лайыҡ булды. "Әсәйҙәр һәм бәпәйҙәр" спектакле өсөн Ҡырмыҫҡалы районының "Сатҡылар" халыҡ театры I дәрәжә лауреат дипломы менән бүләкләнде. Икенсе урынды Салауат ҡалаһынан "Катарсис" инклюзив театр, өсөнсө урынды - Салауат дәүләт башҡорт драма театры ҡарамағындағы "Арлекин"өлгөлө балалар театр студияһы яуланы. “Ирәмәл” башҡорт халыҡ театрының йәш артисы Арслан Хөсәйенов ирҙәр ролен иң яҡшы башҡарыусы дипломына лайыҡ булды. Еңеүселәргә Дипломдар һәм аҡсалата бүләктәр тапшырылды.
Мостай Кәрим исемендәге Милли йәштәр театрында режиссерҙар һәм театр коллективтары етәкселәре өсөн семинар-практикумдар үтте. Республика балалар һәм йәштәр театрҙары фестивале сиктәрендә режиссерҙар өсөн ижади лабораториялар булдырылды. Инйәр “Елмерҙәк” халыҡ һәм “Ҡолонсаҡ” балалар театры режиссеры Сәғилә Мырҙағәлина, Асы һәм Тирлән мәҙәниәт усаҡтары етәкселәре Йәмилә Сәлимйәнова, Василиса Недоспасова ҡатнашты.
Фестиваль-конкурстарҙа юғары баһаларға лайыҡ булған туған коллективты ҙур еңеүе менән ҡотлайбыҙ. Артабан да уңыштарығыҙ күп булһын!
