Ադրբեջանի հետ անվտանգության հնարավոր երաշխիքների կամ համաներման վերաբերյալ բանակցություններից առայժմ կոնկրետ արդյունքներ չկան, Reuters-ին հայտնել է Արցախի նախագահի խորհրդական Դավիթ Բաբայանը։
«Այս հարցերը դեռ պետք է լուծվեն»,-ասել է Բաբայանը։
Վերջինս ասել է, որ պայմանավորվածություն է ձեռք բերվել, որ այսօր հումանիտար ավտոշարասյուն է ժամանելու Լաչինի միջանքով, ինչն Ադրբեջանն արդեն 9 ամիս արգելում է։
«Իրավիճակը շատ բարդ է, մարդիկ սովամահ են լինում, էլեկտրականություն չկա, վառելիք չկա։ Մենք շատ փախստականներ ունենք»,-ասել է Բաբայանը։
Այսօր Ադրբեջանի նախագահի օգնական Հիքմեթ Հաջիևը հայտարարել էր, որ Բաքուն դիտարկում է Լեռնային Ղարաբաղում զենքերը վայր դրած հայերի համաներման հարցը։
Սեպտեմբերի 19-ին Ադրբեջանը լայնամասշտաբ հարձակում է սկսել Արցախի Հանրապետության նկատմամբ։ Վերջին տվյալներով կա 200 զոհ և 400 վիրավոր։ Ադրբեջանի պաշտպանության նախարարությունը հայտարարել էր ԼՂ-ում զինված գործողություն սկսելու մասին։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»:
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, բայց Ադրբեջանը չպահելեց պայմանավորվածությունը և երեկ՝ սեպտեմբերի 21-ին, կրկին խախտել էր հրադադարը։
Ըստ համաձայնության՝ սեպտեմբերի 21-ին հանդիպում տեղի ունեցավ Եվլախում։ Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը հայտարարել էր, որ Եվլախում տեղի ունեցած բանակցությունները կարող են հանգեցնել Բաքվի և Երևանի միջև խաղաղության պայմանագրի կնքմանը։ Սեպտեմբերի 21-ին ավելի ուշ պաշտոնական Ստեփանակերտը հայտարարեց, որ գործնական մթնոլորտում անցած հանդիպման ընթացքում քննարկվել են երկուստեք կարևորություն ունեցող մի շարք հարցեր: Ըստ Ստեփանակերտի՝ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
