12 сентябрҙә Мәскәүҙә Башҡортостан Башлығы Радий Хәбиров Рәсәй дәүләт академия Ҙур театрында булды. Унда Башҡорт опера һәм балет театры Николай Римский-Корсаковтың “Садко” операһының премьераһын сәхнәләштерҙе. Спектакль тәү тапҡыр тамашасыға 2022 йылдың ноябрендә Өфө сәхнәһендә тәҡдим ителде. Ҡуйыусы режиссеры – Рәсәйҙең атҡаҙанған артисы Асҡар Абдразаҡов, дирижер пульты артында – Рәсәйҙең халыҡ артисы Феликс Коробов. “Садко” операһына тиклем башҡорт театры Ҙур театр сәхнәһендә “Аттила”, “Дон Кихот”ты тамашасылар иғтибарына тәҡдим иткән. Һуңғы операға иһә Рәсәй Президентының Волга буйы федераль округындағы Тулы хоҡуҡлы вәкиле Игорь Комаров та килгән. Спектакль тамамланғандан һуң, республика Башлығы Башҡорт дәүләт опера һәм балет театры артистарына рәхмәт белдерҙе. – Һеҙ өсөнсө тапҡыр ҙур театрҙың тарихи сәхнәһенә сығаһығыҙ, шуның өсөн ҙур рәхмәт! Беҙ башҡа ҡалаларҙа һәм төбәктәрҙә йәшәүселәргә лә ижади ҡаҙаныштарыбыҙҙы күрһәтергә теләйбеҙ. Киләһе йыл спектаклдәрҙең береһен Санкт-Петербургта күрһәтергә килештек, – тине Башҡортостан Башлығы Радий Хәбиров. Фото: glavarb.ru
