Уҙған көндәрҙә Мәжит Ғафури исемендәге Башҡорт дәүләт академия драма театрында йәйге ялдан һуң труппаның традицион йыйылышы уҙҙы. Унда баш режиссер Айрат Абушаһманов киләһе миҙгелгә ижади пландар хаҡында һөйләне: "Планлаштырылғанса, 104-се театр миҙгелен 4 октябрҙә Заһиҙә Мусинаның повесы буйынса “Килен” спектакленең премьераһы менән асабыҙ. Спектакль өҫтөндә Башҡортостан Республикаһының атҡаҙанған артисы Фирғәт Ғарипов эшләй. Был бәхет формулаһын таба алған йәш ҡатын исеменән ғибрәтле хикәйәләү була. Быйыл Ш. Бабич исемендәге дәүләт йәштәр премияһы лауреаты Илсур Ҡаҙаҡбаев Мәжит Ғафуриҙың «Заятүләк менән Һыуһылыу» әҫәре өҫтөндә эшләй башлай. Ул ғаилә менән ҡарау өсөн тәғәйенләнгән. Бынан тыш, киләсәктә «Пушкин картаһы» буйынса тәҡдим ителергә тейешле бер нисә спектакль ҡуйырға ниәтләйбеҙ". Әлеге ваҡытта Айрат Әхтәм улы күптән көтөлгән премьера өҫтөндә эшләй башланы. Был яҙыусы Таңсулпан Ғарипованың "Бөйрәкәй" романы буйынса сәхнәләштереү. Шулай уҡ уның пландарында - донъя классикаһы - У. Шекспирҙың «Гамлет» спектаклен сәхнәләштереү. Миҙгел асылғанға тиклем Башҡорт драма театры коллективын алыҫ гастролдәр ҙә көтә: 19-20 сентябрҙә Рәсәй Федерацияһы Мәҙәниәт министрлығының «Ҙур гастролдәр» Бөтә Рәсәй гастроль-концерт планы сиктәрендә театр Ҡабарҙы-Балҡар Республикаһына Нальчик ҡалаһына барасаҡ. Алдағы ваҡытта шулай уҡ республика һәм Яр Саллы буйлап «Бәхет хаҡы» спектакле (Х. Мөҙәрисова, А. Абушаһманов) менән гастролдәр ҡаралған. Ә ноябрҙә Башҡорт драма театрының Ҡазанға сираттағы гастролдәре планлаштырыла. Иң яуаплы сығыш 10 октябрҙә үтер, моғайын. Был көндө «Джут» Венгрияла Халыҡ-ара театр олимпиадаһында сит ил тамашасыларына күрһәтеләсәк. Фото: БДАДТ.
