Беҙҙең операны Ҙур театр сәхнәһендә күрһәтәсәктәр

12 сентябрҙә Рәсәйҙең Ҙур театрында Башҡорт опера һәм балет театрының гастролдәре үтә. Өфө артистары илдең төп театрының Тарихи сәхнәһендә «Садко» операһын тәҡдим итә. Хәтерегеҙгә төшөрәбеҙ, спектаклдең премьераһы уҙған йылдың ноябрендә Башҡорт опера һәм балет театрында уҙҙы. Был спектакль театрҙың бынан алдағы миҙгелендәге иң күләмле, сағыу, күмәк артист ҡатнашҡан ваҡиғаға әүерелде - ҡайһы бер сәхнәләрҙә бер үк ваҡытта 200-гә яҡын артист сәхнәгә сыға. Операның ҡуйыусы дирижеры - К.С. Станиславский һәм Вл.И. Немирович-Данченко исемендәге Мәскәү музыка театрының баш дирижёры, Рәсәйҙең халыҡ артисы Феликс Коробов. Ҡуйыусы режиссеры - Рәсәйҙең атҡаҙанған артисы Асҡар Абдразаҡов, ҡуйыусы рәссамы - Башҡортостандың атҡаҙанған артисы Иван Складчиков. Ҡуйыусы хормейстер - Башҡортостандың атҡаҙанған артисы Александр Алексеев. Ҡуйыусы хореограф - Рәсәйҙең атҡаҙанған сәнғәт эшмәкәре Ирина Филиппова. Яҡтыртыу буйынса рәссам - Рәсәйҙең атҡаҙанған мәҙәниәт хеҙмәткәре Ирина Вторникова. Фото: Башҡорт опера һәм балет театры.