Бөгөн Өфөлә башланған “Беҙ бергә. Спорт” йәйге Сурдлимпиада уйындарына килгән көйәрмәндәр араһында Әстерхан өлкәһенән Лариса менән Александр Терентьевтар ғаиләһен осратып һөйләшеү мөмкинлеге тыуҙы. Улар ҡыҙҙары Викторияның һәр ярышына үҙ машиналарында килә. Виктория туғыҙ йәштән йөҙөү спорты менән шөғөлләнә һәм ете тапҡыр Сурдлимпиада уйындарының чемпионы исемен яулаған. Ата-әсәһе ҡыҙҙарының уңышы менән ныҡ ғорурлана. Викторияның көйәрмән төркөмөнә ғаилә дуҫтары Валентина менән Сергей Аставьевтар ҡушылған. - Әстерхан өлкәһенә һигеҙ йыл элек Донбасстан күсеп килдек. Унда йәшәүе хәүефле ине. Яңы ерҙә беренсе көндән Терентьевтар ғаиләһе беҙгә терәк булды. Уларҙың ҡыҙҙары Виктория менән беҙ ҙә ғорурланабыҙ. Бала саҡтан ишетеү һәләтенән мәхрүм булған ҡыҙҙың ихтыяр көсө, еңеүгә ынтылышынан өлгө алабыҙ. Уның еңеүселәр араһында булырына ышанабыҙ, - ти Сергей Астафьев. Әлеге мәлдә Римма Баталова исемендәге Спорт әҙерлеге үҙәгендә спортсылар ярышҡа әҙерләнә. “Беҙ бергә. Спорт” йәйге Сурдлимпиада уйындарында 30 илдән ике меңдән ашыу һаңғырау спортсы 21 дисциплина буйынса наградалар өсөн көрәшәсәк. Автор фотоһы.
