Юлдаш радиоһы

Календарға күҙ һалдығыҙмы? Бөгөн бит 26.03.26! Бындай матур даталар бик һирәк осрай. Нумерологтар әйтеүенсә, ҡабатланыусы һандар көслө энергияға эйә һәм яңы эштәр башлау, маҡсаттар ҡуйыу өсөн иң уңышлы көн һанала. Ә иң мөһиме – бөгөн теләгән теләктәр мотлаҡ ҡабул була, тиҙәр! Беҙ тыныслыҡ теләйбеҙ. Дуҫтар, һеҙ ҙә ошо яҙма аҫтында үҙегеҙҙең теләктәрегеҙҙе яҙып ҡалдыра алаһығыҙ.

🎉УРА! Һөйөнсө! "Юлдаш" — ил кимәлендә иң яҡшыһы! «Вместе Медиа. Контент» фестивалендә «Юлдаш» радиоһы юғары еңеү яуланы, тип Санкт-Петербургтан коллегабыҙ, продюсер Илнур Рамазанов һөйөнөслө хәбәр еткерә. Иң ҙур ҡыуанысыбыҙ — Өфө-Аренаны гөрләткән, 6 мең тамашасыны берләштергән "Юлдаш"тың 25 йыллыҡ юбилейына арналған халыҡ-ара йыр фестивале коммерция проекттары араһында беренсе урынға лайыҡ булды. Был масштаблы проекттың абруйлы эксперттар тарафынан юғары баһаланыуы — һәр беребеҙ өсөн оло мәртәбә. Еңеүҙәр быны менән генә сикләнмәй: «Ҡараш» проекты (авторы — Миләүшә Ғәлиева) һәм «Мираҫ» тематик тапшырыуы (авторы — Гүзәл Зарипова) — өсөнсө урынға сыҡты. Афарин, коллегалар! Рәхмәт , тоғро тыңлаусылар! Бергә булдырҙыҡ! 25 йыл бергә! 💚

Республика йәмәғәтселеге Башҡортостандың халыҡ артисы Әхәт Мортазинды иҫкә ала. Бөгөн уның вафат булған көнө. Коллегабыҙ Әхәт Мотаһар улы радио тыңлаусыларға утыҙ йылдан ашыу көн һайын хәйерле иртә теләне, телетапшырыуҙар алып барҙы. Танылған дикторҙың тыуған яғы Учалыла “Диктор тауышы” конкурсы уҙғарыла, тыуған ауылы Яңы Байрамғолда Мортазиндар музейы булдырылды. Йыл һайын Өфөлә Әхәт Мортазин иҫтәлегенә волейбол буйынса турнир ойошторолоп килә. Өфө һөйләй, Сәғәт һуғыу менән, Радиолғысты асам йыш ҡына. "Өфө һөйләй", - тиеп таныш тауыш, Әйтер кеүек, шуға ашҡынам. Ваҡыт үтә барыр, йылдар, айҙар, Һыуҙары ла ағыр, ауыр ҡаялар. "Юлдаш" һөйләп торор, уны тыңлар, "Юлдаш" менән булыр, юлдаштар. "Өфө һөйләй". Әйткән һүҙҙәреңде, Иҫтә тотоп, барам эҙеңдән. Әйтелерҙәр, төбәп әйтер һүҙҙәр, Өфө һөйләр, тыңлар, хәтерләр... Илнар Әхмәтгәрәев. Беҙ МАХ каналында: http://max.ru/uldash_fm

Яугир әсәһе - милләт әсәһе Йәшләй генә һәләк булған яугир, бейеүсе Илнар Хәтмуллиндың һөйөклө әсәһе, Башҡортостандың атҡаҙанған артисы Лариса Хәтмуллина "Ҡатын-ҡыҙ – милләт әсәһе" Бөтә Рәсәй конкурсының муниципаль этабында "Милләт әсәһе" номинацияһында еңеп сыҡты. Илнар Хәтмуллиндың батырлығын халыҡ онотмаҫ. Батыр ул үҫтергән әсәгә рәхмәт! Беҙ МАХ каналында: http://max.ru/uldash_fm

‼️ Ноябрҙә балалы ғаиләләр һәм пенсионерҙар өсөн социаль пособиелар түләү графигы үҙгәрә. "Известия” газетаһы хәбәр итеүенсә, төҙәтмәләргә рәсми байрам көндәре һәм ял көндәрен күсереү сәбәпсе булған. Халыҡтар берҙәмлеге көнөн байрам итеү һәм ял көндәренең айырым графигына бәйле түләүҙәр ваҡытынан алда башҡарыла. 🗓️1 ноябрь – эш көнө, 3 ноябрь - ял көнө, шуға күрә граждандарға социаль түләүҙәр 1 ноябрҙә килә. Октябрҙә 80 йәше тулған граждандарҙың пенсияһының база өлөшө 17 815 һумға тиклем арттырыла.

Милли музейҙа Ҡурай көнөнә күргәҙмә 10 октябрҙә республикабыҙҙа рәсми рәүештә тәүге тапҡыр Ҡурай көнө билдәләнә. Ошо айҡанлы Башҡортостан Республикаһының Милли музейында күргәҙмә асыла. Ул 9 октябрҙән 5 ноябргә тиклем эшләй. Экспонаттар араһында һирәк осрай торған китаптар, баҫылып сыҡҡан ноталар, ҡурайҙың үҫешен күрһәткән архив фотолары бар.  Күргәҙмәгә заманыбыҙҙың шәп ҡурайсылары - "АЙ ЙОЛА" төркөмө солисы Ринат Рамазанов һәм мультиинструменталист, ZAINETDIN этнопроекты етәксеһе Заһир Зәйнетдинов та үҙҙәренең музыка ҡоралдарын тапшырған.

Һыу башняһы биләмәһен төҙөкләндереү дауам итә. Өфөлә боронғо һыу һурҙырғыс башня янындағы яңы йәмәғәт киңлеге көндән-көн матурлана. Ул Телеүҙәк артындағы ҡалҡыулыҡта урынлашҡан. Бында күптән түгел күҙәтеү майҙанында арка ҡуйылды. Ул киләсәктә матур фотосессиялар, шул иҫәптән туйҙар өсөн өҫтәмә элемент буласаҡ.