Мои дорогие, очень важно молиться о согласии и благополучии в семье. Святитель Иоанн Златоуст напоминал: «Где молитва и благодарение, туда приходит благодать Святаго Духа, оттуда прогоняются демоны, и все вражеские силы отступают и обращаются в бегство». Сохраните для себя эти молитвы и поделитесь с теми, кому они особенно нужны.
О умножении любви и искоренении ненависти и всякой злобы:
Сою́зом любве́ апо́столы Твоя́ связа́вый, Христе́, и нас Твои́х ве́рных рабо́в к Себе́ тем кре́пко связа́в, твори́ти за́поведи Твоя́ и друг дру́га люби́ти нелицеме́рно сотвори́, моли́твами Богоро́дицы, Еди́не Человеколю́бче.
Молитва Пресвятой Богородице о семье:
Влады́чице Преблагослове́нная, возьми́ под Сво́й покро́в семью мою́. Всели́ в сердца́ супру́га моего́ и ча́д на́ших ми́р, любо́вь и непрекословие всему́ до́брому; не допусти́ никого́ из семьи́ мое́й до разлуки и тя́жкаго расставания, до преждевременныя и внеза́пныя сме́рти без покая́ния. А до́м на́ш и все́х на́с, живу́щих в не́м, сохрани́ от о́гненнаго запале́ния, воровскаго нападе́ния, вся́каго зла́го обстоя́ния, разнаго страхова́ния и диа́вольскаго наважде́ния. Да и мы́ ку́пно и разде́льно, я́вно и сокрове́нно бу́дем прославлять и́мя Твое́ Свято́е всегда́, ны́не и при́сно, и во ве́ки веко́в. Ами́нь.
Молитва о семейном благополучии блаженной Ксении Петербургской:
О, препро́стая о́бразом жития́ своего́, бездо́мная на земли́, насле́днице же оби́телей Отца́ Небе́снаго, блаже́нная стра́ннице Ксе́ние! Я́коже пре́жде к надгро́бию твоему́ неду́жнии и ско́рбнии припа́давшии и а́бие утеше́ниями исполня́емии, си́це ны́не и мы́ (имена́), обурева́емии тлетво́рными обстоя́нии, тебе́ прибега́юще, с наде́ждою про́сим: помоли́ся, блага́я небоше́ственнице, дабы́ испра́вилися стопы́ на́ша по словеси́ Госпо́дню к де́ланию за́поведей Его́, и да упраздни́тся богобо́рное безбо́жие, плени́вшее гра́д тво́й и страну́ твою́, поверга́ющее на́с, многогре́шных, в сме́ртное братоненавиде́ние, го́рдое самовозбеше́ние и ху́льное отча́яние. О, блаже́ннейшая Христа́ ра́ди, посрами́вшая суему́дрость ве́ка сего́, испроси́ у Творца́ и Пода́теля вся́ческих бла́г дарова́ти на́м смире́ния, кро́тости и любве́ в сокро́вище се́рдца на́шего, ве́ры в укрепле́ние моли́твы, наде́жды в покая́нии, кре́пости в многотру́днем житии́, милосе́рдаго исцеле́ния души́ и те́ла на́шего, целому́дрия в супру́жестве и благопопече́ния о бли́жних и и́скренних свои́х, всего́ жития́ на́шего обновле́ние в чисти́тельней ба́не покая́ния, я́ко да всехва́льно воспева́юще па́мять твою́, просла́вим в тебе́ чудоде́йствующаго, Отца́ и Сы́на и Свята́го Ду́ха, Тро́ицу Единосу́щную и Неразде́льную во ве́ки веко́в. Ами́нь.
Об устранении семейных неурядиц мученикам и исповедникам Гурию, Самону и Авиву:
О, пресла́внии му́ченицы Гу́рие, Само́не и Ави́ве! К вам, я́ко ско́рым помо́щником и те́плым моли́твенником, мы немощни́и и недосто́йнии прибега́ем, усе́рдно моля́ще: не пре́зрите ны, во мно́гая беззако́ния впа́дшия и по вся дни и часы́ согреша́ющия: наста́вите на путь пра́вый заблу́ждшия, исцели́те стра́ждущия и скорбя́щия; соблюди́те ны в непоро́чнем и целому́дреннем житии́, и я́коже дре́вле, та́ко и ны́не покрови́телие супру́жеств пребу́дите, в любви́ и единомы́слии сия́ утвержда́юще и от всех злых и бе́дственных обстоя́ний избавля́юще.
Защити́те, о многомо́щнии испове́дницы, вся правосла́вныя христиа́ны от напа́стей, злых челове́к и ко́зней де́монских: огради́те я от неча́янныя сме́рти, умоля́юще Всеблага́го Го́спода, да вели́кия и бога́тыя ми́лости нам, смире́нным рабо́м Свои́м, проба́вит. Не́смы бо досто́йни нечи́стыми устна́ми призыва́ти великоле́пое и́мя Созда́теля на́шего, а́ще не вы, святи́и му́ченицы, за ны хода́таи бу́дете: сего́ ра́ди к вам прибега́ем и предста́тельства ва́шего пред Го́сподем о нас про́сим.
Та́кожде изба́вите нас от гра́да, пото́па, огня́, меча́, наше́ствия иноплеме́нных, междоусо́бныя бра́ни, смертоно́сныя я́звы и вся́каго душепа́губнаго обстоя́ния. Ей, страстоте́рпцы Христо́вы, устро́йте нам моли́твами ва́шими вся блага́я и поле́зная, да благоче́стно житие́ вре́менное преше́дше и кончи́ну непосты́дну стяжа́вше, удосто́имся те́плым засту́плением ва́шим со все́ми святы́ми одесну́ю правосу́днаго Бо́га Судии́ ста́ти и Того́ непреста́нно сла́вити со Отце́м и Святы́м Ду́хом во ве́ки веко́в. Ами́нь.
☦️ Позитивный Батюшка ☦️ Священник Антоний Русакевич - подпишитесь
