ԱՄՆ-ն նպատակ ունի Ռուսաստանին հեռացնել Հայաստանի և Ադրբեջանի միջև խաղաղ գործընթացից, հայտարարել է ՌԴ փոխարտգործնախարար Միխայիլ Գալուզինը «Россия-24» հեռուստաալիքի եթերում։
«ԱՄՆ-ն ամենուր փորձում է հասնել նույն բանին. մի կողմից՝ դուրս մղել Ռուսաստանին, իսկ մյուս կողմից՝ նեոգաղութային ոճով հպատակեցնել անկախ պետություններին, որոնք Ռուսաստանի գործընկերներն ու դաշնակիցներն են, միջամտել մեր գործընկերությանը դաշնակիցների և հարևանների հետ: Դա միշտ եղել է Ամերիկայի գլխավոր խնդիրը»,- ասել է նա։
Գալուզինն ընդգծել է, որ Մոսկվան դեմ չէ, որ այլ երկրները նպաստեն Երևանի և Բաքվի միջև հարաբերությունների կարգավորմանը, բայց ոչ խոսքով, այլ գործով՝ Ռուսաստանի, Ադրբեջանի և Հայաստանի ղեկավարների կողմից ձեռք բերված հիմնարար պայմանավորվածություններին համապատասխան։ «Մի քանի այլ միջնորդների ջանքերը պետք է հավելյալ արժեք տան հենց հայ-ադրբեջանական հարաբերությունների կարգավորման հիմնարար փաստաթղթերի իրականացման տեսանկյունից»,- եզրափակել է ՌԴ ԱԳՆ ղեկավարի տեղակալը։
Ավելի վաղ ՌԴ ԱԳՆ ներկայացուցիչ Մարիա Զախարովան հայ-ադրբեջանական հարաբերությունների կարգավորման հարցում ԱՄՆ-ի և ԵՄ-ի ջանքերն անվանել էր «դրսից պարտադրված խաղաղ բանաձևեր»։ Նա հավելել էր, որ դա վերաբերում է հատկապես նրանց, ովքեր «խորհուրդ են տրվում և առաջ են մղվում արագացված տեմպերով» և, նրա խոսքերով, «երբեք ոչ մի լավ բանի չեն հանգեցրել»։ «Դուք պետք է իմանաք տարածաշրջանի պատմությունը, հակամարտությունը, ժողովուրդներին: Դուք պետք է դա իմանաք և խորապես զգաք: Եվ ամենակարևորն այն է, որ դուք մղվեք իսկական խաղաղ կարգավորման հիմնական նպատակի համար, և մեկ այլ, ոչ պակաս կարևոր բան՝ ձեր գործողություններում ինչ-որ երկրորդ հատակ չունենաք», - պարզաբանել է ռուսական գերատեսչության ներկայացուցիչը:
Հունիսի 1-ին Քիշնևում բանակցություններ են կայացել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև։ Նրանց մասնակցել են նաև Եվրոպական խորհրդի նախագահ Շառլ Միշելը, Ֆրանսիայի նախագահ Էմանուել Մակրոնը և Գերմանիայի կանցլեր Օլաֆ Շոլցը։ Ավելի վաղ Հայաստանի և Ադրբեջանի ղեկավարները հանդիպել են մայիսի 25-ին Մոսկվայում՝ ՌԴ նախագահ Վլադիմիր Պուտինի մասնակցությամբ։ Մայիսի 1-ից 4-ը ԱՄՆ պետքարտուղարի առաջարկությամբ և միջնորդությամբ Միրզոյանի և Բայրամովի հանդիպումը կայացել է նաև ԱՄՆ-ում։ Բանակցություններից հետո ԱՄՆ պետքարտուղար Էնթոնի Բլինկենը նշել է, որ Երևանն ու Բաքուն «շոշափելի առաջընթաց» են գրանցել, և վերջնական համաձայնությունը «հասանելի է»:
