Яйтаӈык чининкинэв’ этгиӈо Камчаткакэнав’- яноткенав’ танвэтгыӈгиӈо «Берингиякенав’». В’уткекъйит в’аняватэ инэллэчг’ын крайик эначгыпавылг’ыйикыӈ. Инэллэчг’ын регионык эвыӈ, яноткэнав’ танвэтгыӈгиӈо лыкл’эӈкин ангытэн «Берингия-2021»- тит лиги нэнг’ылӈикынэв’ юнэтылг’э Камчаткак айгытӄываятэн чининкинэв’ ёнатгиӈо то вэтгиӈо. «В’утин гивик мытытгымалла тэйкык ячвыӈчатгиӈын омакаӈ спортивный то айгытӄываяткэчг’энаӈ. То ымыӈ мытытгымалла, тит гамгаюнэтылг’э то ямкичилг’а утгыкэ нэнг’ыгитэн. В’отэныӈӄо мыттэйкынэв’ ымыӈ ею омакаӈ ангытыткома нынылг’этылг’ын «Берингия-2021». Ымнеделяк ягалалайкэ умекету, миӈки ятвалайкэ федеральный то ӄутиннутэкинэв’ в’аняватылг’о. Ымоӈ мочгынан мыког’олалаӈын 27-28 чиӄъивив’ йиг’илгын, титэ яӈвоӈ льгиячвыӈчатгиӈын г’ытг’ылг’ин меӈин ягалаӈ Эссоӈӄо- Оссорайтыӈ. В’утин г’ытг’ылг’а нэетилиӈнэв’ ӈынвыӄ айгытӄыв’уйву, то нэегитэйкыӈнэв’ ымыӈ ею айгытӄываятэн, меӈию еппы котвалаӈ. Ӄулинкин Айгытӄын- лиги лыӈык то яйтаӈык айгытӄываятэн этгиӈо, то в’иннетык ыччу йиплэпавык»,-эвыӈ В. Солодов.
Ынно опта эвыӈ , инэллэиччетэ крайик нэев’иннетикынэв’ чининкинэв’ митычг’у тэминӈык, меӈию ӄонпыӈ ковэталаӈ.
«Тыкивыӈ, тит лиги мынг’ылӈылайкэ то мынг’ыв’эннялайкынав’ митычг’у чененваяткэчг’энаӈ вэтатык ымгэвэгиӈын. Мытакмэлан тайкыён,тит йинтоӈвавык яӈъя итылг’у грантав’ титэ еплиткуӈ ячвыӈчатгиӈын. Ыччу еллайкэ метычг’ыйикыӈ чененкечг’энаӈ вэтатык, то меӈиныйик накумг’ыг’ав’ накояяйтаӈнав’ айгытӄываятэн вэтгиӈо»,- иви инэллэчг’ын крайик.
Йиннимэв’нэн С. Тынанто.
