Ӈэрм’ яна’ сяр” нимня яля’ сэвкако ядемба ябире. Ты пэртя” таны мядэхэто’ ёнда”. Сую” ӈадимяць. Нув’ сармик” мякто’ паромби”. Тохолковы” ӈацекы” небяхато’ нисяхато’ тэвыд. Экзамен пэртя”, урокадо’ тохоламби”
Ямал яна’ тиӈгэвна нарэй яля’ сэв сырам’ холкабтамби. Ӈарка харад” някуна салаба ӈарка яв’ Обьхана лабаравы. Ӈэрм’ някуна яха” тамна хэвдавэй”. Я’ ниня хусувэй яляхад варё” ӈарамданна”. Нямэхэна, Ямальский район’ тиӈгэвна сиениць ирыхана сую” ӈадимяць. Сеяха’ выӈгана ӈобтарем’ мале сян сую ӈэвысь. Тедахав’ ӈока”.
– Маня” нерденя суюна” ты” ниць нюртей яляха”на ӈадимяць. Хусувэй’ по’ яхадей тэрабасетына”. Пыдо’ харто’ ивняндо’ хадырцеты”. Ӈавхы’ похо”на пивня ядэрта” танясетвы”. Сую хадабавы”, ӈавормы”. Теда’ тарцява’ юӈгу, сава. Суюхо’ харвана” ӈани’ ӈопой нохо”. Яхадена” тяхакумна сюртембсетына”. Нохо’ яӈгом’ мэцетыва”. Хабтха”на ханха”на тэвсятына”. Сую савовна лэтраб”, ӈани’ яляхана тыт мандал” ӈарамда, ӈарка ты” е”эй таняӈгу, – Дмитрий Окотэтто ма, пыда ты пэртя, выӈгана иле.
Ты” ниць иры’ ерь” яляха”на пудана хабейнда” хойня’ ӈэдалэйдаць. Тад пунахав сыра нюлартаӈгу, ӈэдалё тоянаӈгу. Хой’ тер” няби сыра’ ӈэсонд’ тэмдормы”. Фактория” хэвхана мэна” тикахад та’ тэмдорць пиртадо’. Ӈани’ ханяӈы” мор” машинахат тэмдорцеты”. Сабетта’ хэвхана мэна” ӈобтарем’ тикы хардан’ тэворӈа”, тэмдорӈа”.
Хардахана илена” ненэцяи” ӈацекыдо тамна тохолку”. Пудана сян ялядо’ хаи”. Вы’ тер” ню” тохолкода ӈацекы” нямэркахана урокадо’ малейдаць. Интернахана мэна” хойня’ хаяць. Ӈацекы” ӈокаюм’ пелядо’ явна ӈэдалэйдаць. Нисянадо’ небянадо’ хосаяйдонзь. Я’ мал” някуна илена ӈацекы” тиртя ӈанохона ханэйдонзь. Тикы манзъям’ Сёяха’ харад’ тохолкова мякна манзрана” минредо’. Пыдо’ хусувэй по’ тикы серто’ ӈахакуд тасламбсетыдо’. Хой’ тер” вадетадо’, хибя ханякуна мята ӈэӈгу. Ӈацекы мякад хахаяда факториян’ хаебидо’.
– Мани’ хойня’ ёльце харвани’. Хусувэй по’ тиртя ӈанохона ханцетыни’. Хэвы похона сававна тохолкунись. Оценкини’ хуркари”, ӈокаюм’ пелядо «4», тикы’ хавна «3» няби «5» ӈани’ таня”. Теда’ 8 классм’ маленись. Ӈани похона 9 классан’ хандани’, хаця’ тоянаваӈгабя. Хойняна ёльце сава. Мяд’ манзаи пэрцятыни’, мяк” ӈэдалё ханцетыни’, – Даша Окотэттом’ няби Алла Худим’ тиртя ӈанон’ ӈамдванди’ нерцюня лаханакурць ня”ӈадамсь.
– Мань нисяхани’ телефонхана тандая’ лаханакурӈадамсь. Пыда факториян’ ӈэдалаванзь пэрӈа. Си”ми тикахад ханаӈгу. Маня” мя”ма ю” ӈэдалава. Мальцями’, пибини’ тэвраӈгу. Мань хойня’ ёльце харбилываць. Мякнани’ нисянами’ нядабаӈгудм’, ма”алкодам’, ӈавкыни’ маниеӈгудм’. Нара’ няна хойняна ёльце сава. Сырахав’ хардахана мэдамсь. Мя”ма Сеяха’ хардахад хубта. Каникулха”на интернатхана мэсетыдм’. Ханяӈэхэна неками’ си”ми поселокан’ ханабасеты, – Виталя Вэнго’ ня’ тиртя ӈанохона тиванда нерцюня тарем’ лаханакурӈанинзь.
Нув’ сармик” ӈацекы’ тотрев’ мякандо’ паромби”. Хусувэй нара’ тиртя” сармик” ядембада яхат миӈа”. Пыдо’ ёльце ӈока ям’ тирць пирдалемби”. Я’ ханярид, я’ тиӈгэвна тиртя” турцеты”. Ямал’ я’ сяр” ниня хуркари” мун” сосеты”, марна” ӈока”. Нув’ сармик” соя”ма яхандо’ паромби”, пидя сертаӈгу”.
– Ӈацекына” тоцей. Пыдо Тандъярка’ сарёсь. Тюкы си”ив нюртей яляхана, понедельникхана. Маня” ямданаванзь мэваць, сарём’ манэць, хасеръяна”. Тад пуна пи” несэй ян’ ямдэйнаць. Тына” ивняндо’ хадырӈа”, харасипой’ нина” яебтамбю”. Нараӈэ хэнякы, ябто” то”, сыра холкана. Суюкоцина” ӈадимяцей, тэри савов. Маӈгты” ирыхана сар”ню пюӈгува”. Тикаривна хонана” ни’ ӈэсету”, савовна такалпидо’. Нохо” вэва”, хомбиду”, ӈаворъядо’. Ялякоко ядемби, ихиня тэри савов, – Майя Вэнго ма, пыда выӈгана иле, интернетдо’ таня, няха”ни’ паднанись.
Ты” ниць тадри сусаӈгу. Сёяха’ выӈгана илена”, Тамбей’ няна мэна” ты пэртя таӈы ханото’ хэвхана мэ”. Таны мядэхэто’ ӈэсода”. Сырэй паныдо’, ея тырабтамбаӈгу’. Хой’ тер” сырэй ханодо’ тадаӈгудо’. Я’ сармик” ӈобтарем’ сырэй панэцидо’ тадаби”. Сэр” нохоко”, сэр” тэвасико”, сэр” хоркы” мал пармӈгуд”. Я’ ний ӈарханда варё, яха” ханда”.
Антонина Серасхова
