Сөйгән ярлар алар төрле була,
Ташлап китә ала кайсы да.
Ә мин менә беләм шундый бер яр,
Булыр синең белән кайда да.
Ул - ялгызлык... Искиткеч сөйгән яр,
Сәгать тавышыннан танырсың,
Яңгыр булып тәрәзәңә кагар,
Мәхәббәтен шуннан аңларсың.
Гаеп таба белмәс, талашмас та,
Яхшы яклары күп, санасаң.
Шунсы начар - үзе яратса да,
Яратма аны, кач, качалсаң.
Бар андый яр, үзем генә беләм,
Күп сайланма соңга калырлык.
Уртак сүз тапмасаң кеше белән
Синең ярың булыр Ялгызлык...
Наиля Зарипова
