Башҡортостанда “Һөнәре буйынса иң яҡшыһы” конкурсы йомғаҡтары буйынса махсус хәрби операция ветерандары араһында иң яҡшы профессионалдар билдәләнәсәк.
15 майҙа Башҡортостанда “Һөнәре буйынса иң яҡшыһы” Бөтә Рәсәй һөнәри оҫталыҡ конкурсының төбәк этабы “Икенсе старт” номинацияһы буйынса үтәсәк, тип хәбәр итә “Молодежная газета” баҫмаһы.
Махсус номинация МХО ветерандары өсөн тәғәйенләнгән һәм киң һөнәрҙәр буйынса ҡатнашыусыларҙы саҡыра. Көҙгөһөн конкурстың төбәк этабы еңеүсеһе беренселек һәм төп аҡсалата бүләк – федераль этапта 1 миллион һум өсөн көрәшәсәк.
Конкурс “Кадрҙар” милли проекты ярҙамында үткәрелә.
– “Икенсе старт” – күңеленә оҡшаған эш менән шөғөлләнгән һәм профессиональ ҡаҙаныштары тураһында һөйләй алғандар өсөн бик яҡшы стимул. Конкурс яугирҙәребеҙҙе тыныс тормошҡа ҡайтарыу буйынса йоғонтоло механизм булып торасаҡ.
21 йәштән өлкән ветерандарҙы һәм махсус хәрби операцияла ҡатнашыусыларҙы көтәбеҙ. Улар ялланып эшләүсе хеҙмәткәрҙәр, шәхси эшҡыуарҙар йәки үҙмәшғүлдәр булыуы мөмкин, – тине Башҡортостандың ғаилә, хеҙмәт һәм халыҡты социаль яҡлау министры Ольга Кабанова.
Конкурс теоретик белемде һәм практик эштәрҙе тикшереүҙе үҙ эсенә алған һынауҙар серияһынан тора. Һынауҙар ярыш майҙансығында, шулай уҡ ситтән тороп үткәрелә – ҡатнашыусылар видеоролик йәки электрон презентация күрһәтә.
“Икенсе старт” номинацияһы буйынса конкурстың төбәк этаптарына ғаризаны 2026 йылдың 5 майына тиклем “Рәсәй эше” сайтында ҡалдырырға мөмкин. Хәрби тәжрибәгә эйә булғандар араһында бәйгенең төбәк этабы 15 майҙа Өфөлә Евразия ғилми-белем биреү үҙәгенең вуз-ара студенттар кампусында уҙа. Октябрь башында Һамар өлкәһендә “Һөнәре буйынса иң яҡшыһы” конкурсының “Икенсе старт” номинацияһында еңеүсе республика исеменән сығыш яһаясаҡ.