ВИКТОР ЛАЗ

Молитва ко Пресвятой Богородице (в понедельник), преподобного иеросхимонаха Нила Сорского От скверных уст приими моление, о Нескверная, Чистая и Пречистая Дево Богородице, и не возгнушайся моих словес, о Радосте моя, но призри на мя и помилуй мя, Мати Зиждителя моего. Во время живота моего не остави мене: веси бо, Владычице, яко на Тя всю мою надежду возлагаю и все упование мое о Тебе есть. Темже и во время смерти моея предстани ми. Помощнице моя, Радосте и Сладосте моя: не остави мене тогда, Надежде моя, и не посрами мене тогда. Вем бо, вем, Дево, яко многим грехом повинен есмь, окаянный, и трепещу, помышляя час оный; но, Радосте моя, яви ми тогда лице Твое, удиви на мне милость Твою, Ходатаице спасения моего; изми мя, Владычице, от лютости бесовския и страшнаго и грознаго испытания воздушных духов, и злобы их избави, и всю тогдашнюю скорбь и печаль на радость преложи Твоим присещением. И сподоби безбедно прейти ми начала и власти тьмы, и достигнути поклонитися на Престоле Славы сидящему Христу и Богу нашему, со Безначальным Его Отцем и Пресвятым Духом, во веки. Аминь.

Молитва ко Пресвятой Богородице (в воскресенье), преподобного иеросхимонаха Нила Сорского О Всемилостивая Дево Богородице, Мати щедрот и человеколюбия, прелюбезная Надежде и упование мое! О Мати Пресладкого, Превожделеннаго и всяку любы превосходящаго Спасителя Иисуса Христа, Человеколюбца и Бога моего. Свете помраченныя души моея! К Тебе аз, многогрешный и безнадежный, припадаю, Тебе молюся, Источниче милосердия, Дево Марие, яже бездну милосердия и пучину щедрот и человеколюбия рождшая; помилуй мя, вопию Ти болезненно, помилуй мя всего уязвленнаго, в лютыя разбойники впадшаго и от одежды, в нюже облече мя Отец, увы мне, обнаженного. Тем и лежу наг от всякаго благотворения, возсмердеша и согниша раны моя от лица безумия моего. Владычице моя Богородице, молю Тя смиренно, воззри на мя милостивым Твоим оком и не возгнушайся мене всего помраченнаго, всего оскверненнаго, всего в тине сластей и страстей погруженнаго, люте падшаго и возстати не могущаго. Умилосердися убо на мя и даждь ми руку помощи, воздвигни мя из глубины греховныя, о Радосте моя! Избави мя от обышедших мя; просвети лице Твое на раба Твоего, спаси погибающаго, очисти оскверненнаго, возстави падшаго люте: можеши бо вся, яко сущи Мати Бога Всемогущаго. Излей на мя елей милосердия Твоего и вино умиления точити ми подаждь: Тебе бо воистину едину надежду стяжах в животе моем; не отрини убо мене к Тебе притекающаго, но виждь скорбь мою, Дево, и души желание, и сие прими и спаси мя, Ходатаица спасения моего. Аминь.

Молитва ко Пресвятой Богородице (в пятницу), преподобного иеросхимонаха Нила Сорского Тебе предаю в защищение живот мой и по Бозе всю надежду спасения моего на Тя возлагаю, Владычице Дево Богородице. Молю Тя, раб Твой, не презри мя многия грехи имущаго, но виждь скорбь мою о сем и недоумение и подаждь ми ослабу и утешение, да не до конца погибну. Простри десницу Твою, Чистая, изми мя от тимения дел моих и настави на чистую пажить заповедей Христа, Царя и Бога моего, да творю я присно, Тобою укрепляем. От грехов моих лютых избави мя, Владычице, и покаяние спасительное мне ниспосли, к Твоему Сыну и Богу Матерним ходатайством Твоим. Свет неизреченный возсиявшая, просвети мою тьму душевную, от грехов ей прибывшую. Радосте моя, избави мя от обышедших мя невидимых врагов: грехи бо мои мнози и тяжки суть, врази мои люты зело, смерть близ, совесть моя мя обличает, геена огненная устрашает, червь неусыпаемый, скрежет зубный, тартара тьма кромешняя в трепет мя приводят, ибо ожидают мя прияти, злых дел моих ради. Увы мне! Что сотворю тогда и к кому прибегну, да спасена будет душа моя! К Тебе единей, сладкая Марие Богородице, услаждающая на Тя уповающим горесть смерти и избавляющая взывающих к Тебе от лютыя геены. Ты и мне помози, Всеблагая, не имущему тогда иныя помощи, токмо Тебе, Всепетая. Спаси мя от ужасов смертнаго часа и лютости тогда бесовския, спаси мя от власти духов злобных на мытарствах воздушных по смерти; яви, молюся Ти, яви ми тогда Пресветлое лице Твое, Владычице, и не остави мя безпомощнаго. О Милосердная Мати! Преклонися на милость ко мне, лишенному милости от дел моих, и умоли, Его же родила еси плотию, Христа, Спасителя и Бога нашего, нас ради на Кресте пречистую Кровь Свою излиявшаго, да и аз причастник буду заслуг Его крестных пред Отцем Его Богом, и их ради получу грехов прощение и вечное спасение, и прославлю неизреченное милосердие Твое, Богородице, и Твое милостивое предстательство в безконечныя веки. Аминь.

Молитва ко Пресвятой Богородице (в четверг), преподобного иеросхимонаха Нила Сорского Кто Тебе по достоянию ублажити может, Пресвятая Дево, чии уста воспети способны Твое величие, всяк смысл превосходящее? Вся преславная о Тебе содеянная таинства, Богородице, выше смысла и слова суть; красоте Девства Твоего и пресветлой Чистоте Твоей удивишася Херувимы и ужасошася Серафимы; чудесе бо рождества Твоего нетленнаго ни человеческий, ни ангельский язык изрещи не может. От Тебе бо безлетный и Единородный Сын Божий, Бог Слово, неизреченно воплощся, родися и с человеки поживе, и Тя, яко Матерь Свою, зело возвеличи. Царицу Тя всея твари показа, нам же известное спасения пристанище. Тем вси под кров Твой притекающии, различными скорбями и болезньми одержимии, приемлют от Тебе богатно утешение и исцеление и Тобою от бед спасаются: Ты бо еси воистину Мати всех скорбящих и обремененных, печальных Радость, больных Целительница, юным хранительница, старости жезл, праведных похвала, грешным спасения надежда и к покаянию Путеводительница: всем бо всегда предстательством Твоим помогаеши и всех заступаеши, Всеблагая, прибегающих к Тебе с верою и любовию. Ты и мне помози, отчаянному деяний моих ради. Заступнице усердная рода христианскаго; заступи мя, да не до конца погибну во гресех, ибо не имам инаго прибежища и покрова, разве Тебе, Владычице Мати Живота; не остави убо мене и не презри мя, но ими же Сама веси судьбами спаси мя, яко Благословенна еси во веки веков. Аминь