Колхоз, совхоз төһүү үлэһиттэрэ. Кононова Варвара Тихоновна (1930 - 2012) Варвара Тихоновна 1930 сыллаахха Өргүөт нэһилиэгэр Дьэһиҥдэ диэн сиргэ, Марфа, Тихон Куонаанаптар дьиэ кэргэттэригэр төрөөбүтэ. 1939 сыллаахха оскуолаҕа киирбитэ.1947 сыллаахха сэрии охсуутуттан сылтаан оскуолаттан уурайбыта. Дьэ мантан ыла Балбаара оҕо сааһа уурайбыта. Колхозтаах буолбута. Сайын от үлэтэ, саас саһаан охсуута, сир тиэрдэриитэ, кыһынын атынан бэрэбинэ, ноһуом таһыыта, бурдук сыстарыыта уо. д. а. үлэлэр. 1955 сыллаахха Намҥа МТС-ка тракторист идэтигэр 4 ый үөрэммитэ. Ол курдук Варвара Тихоновна маһынан уматыктанар онтон бастакы кыраһыынынан барар НАТИ трактортан саҕалаан үйэтин тухары сир ийэттэн үрдүк быйаҥы ылыыга үлэлээн кэлбитэ. Бу дьахтарга сөбө суох ыарахан, сүгүүлээх-көтөҕүүлээх, кыһыннары, сайыннары тоҥон- хатан тракторист идэтин баһылаан, кэлин пенсияҕа тахсан баран Т-16 тракторынан үлэни кыайбат буолуор диэри, 59 сааһыгар диэри учаастактартан үүт таһыытыгар,барыта 40 сыл устата үлэ үөһүгэр сылдьан , таптыыр идэтигэр олоҕун анаабыта. Тыа хаһаайыстыбатын министерствота бу ыарахан үлэтин сыаналаан Варвара Тихоновнаҕа Якутскай куоракка дьиэ биэрбитэ.
2 года назад