Жұматай Абильдинов

Қазақтардың орыс тілін білмейтіндері саусақпен санарлық. Ал, олардың ішінде ана тілін жартысынан көбі білмейді және білгісі келмейді. Себебі, қазақ тілі ресми қолданыстан «шығып қалған». Яғни, қазақ тіліне сұраныс жоқ! Демек, орыс тілі қазақ халқының өзін екіге бөліп отыр. Олар - қазақтың тілін, әдебиетін, мәдениетін сақтап келе жатқан нағыз қазақтар және орыс тілді «қазақтар». Ең қорқыныштысы, қазіргі үкімет басындағы орыс тілді «қазақтар» көрші елдің тілін ғана емес, мәдениетін де бойына сіңіргендіктен, мемлекеттік тілдің, мемлекет құраушы қазақ халықтың болашағы үшін олардың басы ауырмайды...

Мемлекеттік тілге сұраныс туғызып, қазақстандық әрбір азаматты отансүйгіштікке тәрбиелеп, қоғамдық мүддені, жеке бастың мүддесінен жоғары қою үшін, Ұлттық Мемлекет құру қажет. Ол үшін, бірінші кезекте келесі шараларды іске асыру керек. 1.Іс жүргізуді толық мемлекеттік тілге көшіру керек. Осы уақытқа дейін іс жүргізу орыс тілінде жүргізіліп келуіне байланысты, бұл шара өте күрделі. Сондықтан, мемлекеттік тілдің деңгейін көтеруге әрбір мемлекеттік қызметкерді ынталандыру үшін, еңбек ақы мөлшері, мемлекеттік қызметкерлердің, мемлекеттік тілді меңгеру деңгейіне сай тағайындалуы қажет...

28 жылдық тәуелсіздік тәжрибесі, жеке адамға табыну, бір адамның ғана жоспарымен «даму» тоқырауға соқтыратынын көрсетті. «50 елдің қатарына қосылсақ керемет мемлекет боламыз, 2020 жылы халықтың жағдайы ғажайып болады», деген «бағдарламалардың» сағым сияқты қиял екенін халық, «30 елдің қатарына қосылудың бағдарламасы» ұсынылғанда бірақ түсінді. Халықты алдай беруге бола ма?! Онсыз да халық уәдеге сеніп, 30 жыл бойы «қиял қуған» биліктің езгісіне шыдады. Қазір Қазақстан халқы ұрпақ болашағы үшін қандай жолды таңдау қажет екенін анықтау керек...