Йома мөбәрәк булһын! Бер Үҙенең ризалығы өсөн тотҡан ураҙабыҙҙы ҡабул итһен! Донъя имен, тыныс, ризығыбыҙ мул, хәләл, һаулығыбыҙ ныҡ, ғаиләләребеҙ тулы, туғандарыбыҙ, күрше-күләнебеҙ һау, эшебеҙ уң, сәфәребеҙ уңышлы булһын! Рамаҙан – түҙемлек, сабырлыҡ, нәфсене һынау, күңелде таҙартыу, рухты тәрбиәләү, тамуҡтан ҡотолоу айы. Бөгөн нәфсе хаҡында булыр һүҙем. Беҙҙең ҡәртәсәйҙәр нәпсе ти торғайны. Нәфсене бер аҙҙырһаң, ул һиңә баш булыр. Һин нәфсеңә баш бул! тип аңланым. Һөйөклө Пәйғәмбәребеҙ Мөхәммәд үҙенең бер хәҙисендә: "Дөрөҫөн әйткәндә, ысын көрәшсе – үҙ нәфсеһе менән көрәшкән кеше", – тигән. Был беҙҙең иң яман дошманыбыҙ. Пәйғәмбәребеҙ, иң ауыр һуғыш- бәндәнең үҙ нәфсеһе менән көрәшеүе, тигән. Был көрәш кешене ғүмере буйы оҙатып бара, бына ошо яуҙа еңһен өсөн уға аҡыл һәм көс-ҡеүәт бирелгән. Йөрәген паклап тотор өсөн Ҡөръән төшөрөлгән, Рамаҙан айы менән бүләкләгән. Аллаһы Сүбхәнәкә үә Тәғәлә һәр ҡайһыбыҙға нәфсебеҙҙе тәрбиәләп, ике донъя бәхетенә ирешергә насип итһен!
6 часов назад