479 подписчиков
Тропарь, глас 4
Житие праведно проходя,/ Духа Святаго сосуд избранный явился еси,/ смиренномудрием и простотою нрава украшен / всякою добродетелию обогатися славне,/ явил еси благородие и светлость души своея,/ ихже ради к мученическому лику причте тя Христос,/ доблестию страданий своих утверждаеши верных сердца,/ священномучениче Евгение,/ моли спастися душам нашим.
Кондак, глас 6
Правыя веры доблий подвижниче,/ и словес Евангельских добрый учителю,/ яко истинный воин Христов подвигом добре подвизался еси,/ и жития течение достойно совершил еси,/ сеянием словес божественных и кровию своею многия плоды Богу принесл еси,/ и данный ти талант умножил еси,/ сего ради обрел еси воздаяние трудов твоих,/ и венец светел от Спаса прияв,/ священномучениче Евгение,/ священства правило и похвало,// соблюдай нас от всякого зла твоими к Богу молитвами.
Молитва
О, преславный и избранный священномучениче Христов, Евгение, града Переславля и всея земли Ростово-Ярославския украшение!
Ты во дни земнаго жития своего в священстве усердно Богу послужил еси и паству вверенною тебе неленностно в заповедях Божиих ходити наставлял еси. Еще же душевным благородством, житием благоговейным просиял еси и благодатию Святаго Духа исполнился еси.
Егда же прииде на землю нашу неверия и безбожия лета, ты верою и терпением препоясався и оружием креста вооружився, неистовство безбожных мужески обличил еси и служение Церкви Христовой не оставил еси. Сего ради многообразныя страдания, поругания, раны и смерть претерпев, ныне радуяся престолу Вседержителя во славе предстоиши.
Несть убо святым Божиим смерть, но преставление от печальнейших на радость и упокоение, и на дерзновенное предстательство пред Богом за верно почитающих их. Сего ради к тебе яко к отцу чадолюбивому припадаем и усердно молим, сохрани град сей егоже возлюбил еси и обитель сию в ней же трудился еси от глада, пожара и злых человек. Живущия же в ней соблюди от падений греховных и от всех наветов диавольских. Всех же почитаюших тя во благочестии и истиной вере утверди, и любовь к Богу и ближним в души наша всели, да тобою наставляеми единеми усты и единем сердцем воспоим и прославим Отца и Сына и Святаго Духа во веки веков. Аминь.
1 минута
Сегодня