2013 нче елның 13 нче гыйнварында кадерле дәү әниебез Гобәйдуллина Мәрьям Гыйният кызы вафат булды. Бу шигырем һәм көем аның изге рухына дога булып ирешсен иде. Амин. Дәү әни, без сине бик сагынабыз! Бигрәк тә балачакта җәйге каникул вакытларында Казан, Волжск шәһәрләренә, Чуваш иле, Кодаш, Каракүл авылларына сеңлем Алсуны да, мине дә кунакка алып йөрүләрең әле дә иң якты хатирәләрнең берсе булып күңел түрендә саклана. Син пешереп сыйлаган бик тәмле ризыкларның тәме әле дә тел очында кебек. Син теккән күлмәкләр, бәйләп кидергән бияләй, оекбашлар, шәлләр һаман да гүя синең күңел җылыңны саклый кебек. Яшь вакыттан авыру-сырхауларны еш кичерсәң дә, бер эштән дә курыкмагансың, сабыр, түзем булгансың. Гариплегеңнән кимсенеп яшәсәң дә, төшенкелеккә бирелмәгәнсең. Безнең өчен син иң үрнәк дәү әни булдың. Барысы өчен дә бик зур рәхмәт сиңа! Ахирәт галәмендә Аллаһы Тәгалә сиңа җәннәт түрләре насыйп итсен. Амин.