26 июндә Өфөнөң «Торатау» конгресс-холында Башҡортостан Башлығы Радий Хәбиров Рәсәйҙең төрлө төбәктәренән III Бөтә Рәсәй балалар фольклориадаһына килгән йәш артистар һәм ижади коллективтар менән осрашты.
Радий Хәбиров балаларҙы сәләмләп фольклориаданың Рәсәй халыҡтарының дуҫлығын һәм берҙәмлеген нығытыу йәһәтенән әһәмиәтен билдәләне.
– Һеҙҙе Өфөлә күреүебеҙгә шатбыҙ. Моғайын, республикабыҙҙа Рәсәйҙең төрлө мөйөштәренән бер ҡасан да ошоса балалар йыйылғаны булмағандыр. Башҡортостан өсөн дә был фестиваль үҙенсәлекле байрам, – тине төбәк етәксеһе. – Күптәрегеҙҙең атайҙары махсус операция зонаһында хәрби бурыс үтәүен беләм. Беҙ бөтә яугирҙарыбыҙҙы иҫән-һау, еңеү менән ҡайтыуҙарын көтәбеҙ.
Артабан осрашыу аралашыу форматында дауам итте. Балалар Радий Хәбировтан бала сағында кем булырға теләүе, нисек һөнәр һайлауы, республика етәксеһе булыу ауырмы, ғаиләһенә ваҡыты ҡалыу-ҡалмауы менән ҡыҙыҡһынды.
Күмертауҙан оҙон көй жанрында башҡорт йырҙарын йәш башҡарыусы Әнүәр Вәхитов Радий Хәбировтың эш кабинетында булырға хыялланыуы хаҡында белдерҙе. Башҡортостан Башлығы малайҙы Республика Йортона саҡырҙы.
Курск өлкәһенән Ариадна Шестопалованың ижади номеры осрашыуҙың иң тулҡынландырғыс мәле булды. Суджа ҡалаһындағы фажиғәле ваҡиғалар менән бәйле уның ғаиләһенә тыуған йортон ташлап китергә һәм өйҙә уникаль халыҡ костюмдары һәм боронғо музыка ҡоралдары коллекцияһын ҡалдырырға тура килә. Ошо һынауҙарға ҡарамаҫтан, Шестопаловтар ижад менән шөғөлләнеүен, үҙ төбәге йолаларын һаҡлап ҡалыуын дауам итә. Осрашыу ваҡытында ғаилә башлығы Евгений Шестопалов үҙ ҡулдары менән эшләгән тынлы инструментта музыкаль номерҙы башҡара.
Төбәк етәксеһе республиканың фольклориаданы үткәреүгә нисек әҙерләнеүе хаҡында ла һөйләне.
– Беҙгә бөтә илдән иң һәләтле мең баланың килеүен белгәс, һеҙгә Башҡортостан тураһында иң йылы хәтирәләр бүләк итергә тырыштыҡ, – тине Радий Хәбиров. – Беҙ бөтә шарттарҙы – уңайлы йәшәү, туҡланыу, экскурсиялар, хәүефһеҙлекте тәьмин иттек.
Фольклориадала ҡатнашыусыларҙың барыһы ла республиканан «Урал батыр» эпосының уникаль баҫмаһы бүләк ителде.
– Был китапта – халҡыбыҙҙың йәне, – тип һыҙыҡ өҫтөнә алды Радий Хәбиров.