ПРОЛОГ на день (09 июня)
Па́мять и́же во святы́х отца́ на́шего Кири́ла, архиепи́скопа Александри́йскаго
Стихи́:
У́мер Кири́лл, Александри́и па́па,
Ко Го́споду пре́йде, всем Го́сподеви:
Обре́те гроб пе́рстьный Кири́лл де́нию в девя́тый.
Кири́лл ди́вный оте́ц наш, бе от гра́да Алекса́ндрьскаго, сестри́чищь Фео́фила патриа́рха того́же гра́да Александри́и. Воспита́н же бысть в том же гра́де во мно́зе наказа́нии. Ри́мским же и е́ллинским научи́ся кни́гам. По успе́нии же отца́ своего́ о́бщим при́чтом прия́ престо́л Алекса́ндрьский. Еретики́ же а́ки во́лки от це́ркве отгна́, и неве́рныя в ве́ру обрати́, и вселе́нную благоче́стием насади́в. И вся́ко писа́ние ве́тхое и но́вое сказа́в. Еретика́ же Несто́рия с престо́ла све́рже. И Пречи́стую Де́ву Мари́ю Христа́ ро́ждьшую, Богоро́дицу нарече́. При Феодо́сии ю́ннем царе́, собо́р во Ефе́се совокупи́в, и Несто́рия посрами́в я́коже бысть рече́но, и Богоро́дицу возвели́чив и Бо́га просла́вив. И доше́д Александри́и мно́ги кни́ги написа́ душеполе́зны, и ко Го́споду отъи́де.
Церковнославянский текст (Источник: Пролог)
#Кирилл #Александрийский #святитель #Пролог
