Май уявĕсем умĕн Мияки районĕнчи Еспуç ялне килсе кĕнĕ çĕртре вырнаçнă «Эпĕ Еспуç ялне юрататăп» стелăна чаплă лару-тăрура уçрĕç. Ăна наци стилĕпе килĕшÿллĕн чăваш эрешĕсемпе илемлетсе туса лартрĕç. Çапла майпа стела яла илем кÿнисĕр пуçне мăн асатте-асаннесен культурине хисеп тунин символĕ те пулса тăчĕ.
«Эпĕ Еспуç ялне юрататăп» проект вырăнта пурăнакансен вăйĕпе пурнăçа кĕчĕ. Шăпах вĕсем укçа-тенкĕ енчен пулăшу пачĕç – пĕрремĕш эскизсенчен пуçласа стелăна вырнаçтариччен. Еспуç хастарĕсем, пуçару ушкăнĕн пайташĕсем – ял старости Геннадий Григорьев, ветерансен канашĕн председателĕ Раиса Ефремова тата çак йĕркесен авторĕ – палăртнă тăрăх, яла килсе кĕнĕ çĕртре вырнаçнă арт-объект ялăн чунне тĕплĕн сăнласа памалла. Çавăнпа та еспуçсем йăлана кĕнĕ чăваш эрешĕсене пысăк тимлĕх уйăрчĕç.
– Асăннă стела пирĕн йăх-несĕлсем çинчен каласа памалла. Чăваш эрешĕ хăйне евĕр управçă, пирĕн астăвăмпа мăнаçлăх шутланать, – пĕлтерчĕç хăйсен шухăшне проект пуçаруçисем.
Халĕ яла килсе кĕнĕ çĕртре хăнасене ахаль çул палли кăна мар, чăн-чăн арт-объекчĕ кĕтсе илет. Стела хăтлăхăн пĕр пайĕ пулса тăма та ĕлкĕрчĕ, ял хутлăхне илемлĕрех тума пулăшрĕ. Унсăр пуçне Еспуç ялĕнче пурăнакансем те, кунта килекен хăнасем те хаваспах стела умĕнче сăн ÿкеççĕ. Уйрăмах çакна уяв кунĕсенче курма пулать.
Арт-объекта шăпах май уявĕсем умĕн уçма ахальтен йышăнман. Çак тапхăрта ял хĕл ыйхинчен вăранса çитет, çынсем субботниксене тухаççĕ, пĕтĕмĕшле ĕçсене хутшăнаççĕ. Наци эрешĕсемпе капăрлатнă стела вырнаçтарни Еспуç ялĕнчи асра юлмалли пулăмсенчен пĕри пулса тăрĕ.
Людмила МАКАРОВА, вулавăш ĕçченĕ.
Мияки районĕ, Еспуç ялĕ.