29 апрельдә Үзәк шәһәр китапхаләр системасында «Фронт һәм тыл бергә: Башкортстан Бөек Ватан сугышында һәм Махсус хәрби операциядә» дип аталган Республика тарихи-патриотик марафонына тантаналы старт бирелде.
Чара Русия Федерациясе һәм Башкортстан Республикасы гимннарын башкару белән башланып китте. Баш методист Ольга Габделхакова кунакларны сәламләп, марафонның максатлары һәм бурычлары белән таныштырды. Программа бай эчтәлекле һәм төрле яшьтәгеләргә юнәлтелгән иде.
Китапханәдә «Вакытлар бәйләнеше» күргәзмәсе эшләде. Төп вакыйга булып китап экспозициясе торды. Ул заманча авторларның батырлык елъязмасын ничек дәвам итүләрен ачык күрсәтте. Олег Рой, Дмитрий Семёнов, Михаил Фёдоров әсәрләре — ул бары тик әдәби әсәрләр генә түгел, ә чор шаһитлекләре. Аларның китапларында Бөек Ватан сугышындагы һәм махсус хәрби операциядәге батырлык, фаҗига һәм төрле һөнәр ияләре язмышлары: очучылардан алып оператор-дроннарга кадәр, штурмчылардан алып элеккеге милиция хезмәткәрләренә кадәр үрелеп бара. Һәр тарих — хәзерге яклаучыларыбызның кыюлыгына һәм бурычка тугрылыгына хөрмәт билгесе.
Экспозиция тематик блокларга бүленгән идее. Бөек Ватан сугышы - якташларыбызның фронттагы каһарманлыгы һәм тылдагы фидакарь хезмәте турында сөйләүче уникаль документлар һәм фотосурәтләр.
Заманчалык - Махсус хәрби операция геройлары һәм волонтерлык хәрәкәте турындагы материаллар. 80 ел элеккеге кебек үк, бөтен тыл бүген каһарманнарыбызны яклау өчен берләшә.
Студентлар һәм яшьләр өчен
Коммуналь төзелеш колледжы студентлары өчен «Батырлык: җиңүчеләр буыныннан геройлар буынына» дигән түгәрәк өстәл оештырылды. Спикерлар булып Октябрьский шәһәре Чик сакчылары туганлыгы» иҗтимагый оешмасы вәкиле Василий Ахтанин, шәһәрнең Сугыш һәм хезмәт ветераннары советы, Кораллы Көчләр һәм хокук саклау органнары вәкиле Пётр Лаптев чыгыш ясады.
10 нчы мәктәп укучылары легендар якташыбыз — Даян Мурзинга багышланган «Кара генерал» документаль фильмын карадылар һәм фикер алыштылар. 12нче мәктәпнең кече сыйныф укучылары өчен Р. Кудояров фильмы буенча кинолекторий үткәрелде.
Яшьләр китапханәсе күп профильле колледж студентлары өчен «Фронт һәм тыл бергә» интеллектуаль уен-квизын уздырды. Чара яшьләрне Бөек Ватан сугышы турындагы белемнәрне тирәнәйтергә, команда рухын үстерергә һәм ватандашларыбызның батырлыклары белән горурлану хисе тәрбияләргә чакырды.
Яшь китап сөючеләр өчен балалар китапханәләрендә дә тематик чаралар узды. 8нче модельле китапханәдә «Төзелеш модельләштерү» һәм «Без — Җир балалары» түгәрәкләрендә шөгыльләнүчеләр өчен «СВОга хат» дигән мастер-класс үтте.
6 нчы модельле китапханәдә 18нче мәктәпнең 7нче сыйныф укучылары өчен квиз-уен оештырылды. Балалар биш раундта сигезәр сорауга җавап биреп, тарихны яхшы белүләрен күрсәттеләр.
Әлеге марафон батырлык истәлегенең буыннан-буынга тапшырылуын ачык күрсәтте.