ПАРЕНЕСИС на день (Слово 87)
Того́жде свята́го и преподо́бнаго отца́ на́шего Ефре́ма наказа́ние к кому́ сло́во рече́но бысть, лу́чше жени́тися и посяга́ти, не́жели раждиза́тися
Послу́шай апостола глаголюща: хоте́л бых да бы́ша вси челове́цы были я́коже и аз есмь, но ко́ждо свой дар и́мать: ов си́це, ин же си́це. Не ра́вно положи́ слово: поне́же бы рекл, ов си́це, ин же си́це. Я́ве яко к жити́йским и ко употакти́том (си́речь, поднача́льным), ре́кше к бельце́м, и к чернеце́м. Разли́чно твори́т, реки́й: Ко́йждо свой дар и́мать от Бо́га, ов си́це, ин же си́це. Ни жити́йским возбрани́л есть зако́нно жени́тися, ни употакти́том отъя́л есть воздержа́ние. Рек, ов си́це, ин же си́це, жити́йским бо вели́т глаго́ля: детораще́ния ра́ди ко́ждо свою́ жену́ да и́мать. И па́ки че́стен брак всем и ло́же нескве́рнено. Блуднико́м же и прелюбоде́ем су́дит Бог. Употакти́том же ре́кше в покоре́нии живу́щим положи́ им воздержа́ние, е́же рече́: Всяк подвиза́яйся, да всегда́ воздержи́тся. Две бо бра́ни поста́вило есть сло́во, яќоже пре́жде реч́е. И ты у́бо мни́ше разуме́й, в кий чин поручи́лся еси. И что зна́мение в не́же оболче́н еси́, и чи́я моли́твы обеща́ния, в ня́же обеща́лся еси́ Бо́гови. Проти́ву бо сим и сло́во возда́си. Рече́ бо Госпо́дь: Усты́ твои́ми сужду ти, рабе лука́вый...
Полный церковнославянский текст (Источник: Паренесис)
