СИНАКСАРЬ на день (Четверток Великаго канона)
Синаксарь в четверток пятыя седмицы Великого поста (Мариино стояние)
Стихи́:
Умиле́нія, Христе́ мо́й, о́бразы да́ждь,
Пою́щимъ ны́нѣ кано́нъ Тебѣ́ Вели́кій.
Въ сíй де́нь, по дре́внему преда́нію, пое́мъ и Вели́каго кано́на послѣ́дованіе.
Се́й вои́стинну всѣ́хъ кано́новъ велича́йшій, изря́дно и хи́тростно сочини́ и списа́ и́же во святы́хъ оте́цъ на́шъ Андре́й, архіепи́скопъ Кри́тскій, и́же и Іерусали́мскій имену́емый. Иже устремля́шеся у́бо изъ Дама́ска, о четыренадеся́тѣмъ же лѣ́тѣ своего́ во́зраста, наказа́нію граммати́ческому изда́вся, и окру́гленное наказа́ніе изучи́въ, во Іерусали́мѣ бы́въ, мона́шеское прохо́дитъ житіе́, преподо́бнѣ же и боголюбе́знѣ жи́вый въ безмо́лвномъ и немяте́жномъ житіи́.
Мно́га у́бо и и́на списа́нія животополе́зная оставля́етъ Бо́жіей Це́ркви, словеса́ же и кано́ны, па́че же му́жественнѣ въ торже́ственныхъ быва́емый же и показу́емый. Со мно́гими же ины́ми и настоя́щій Вели́кій кано́нъ сочини́, умиле́ніе неисче́тно иму́щъ, вся́кую бо Ве́тхаго и Но́ваго Завѣ́та по́вѣсть сниска́въ и собра́въ, настоя́щее сочини́ сладкопѣ́ніе, отъ Ада́ма я́вѣ, да́же и до самого́ Христо́ва Вознесе́нія и апо́стольскія про́повѣди. Поуща́етъ у́бо си́мъ вся́кую ду́шу, ели́кимъ у́бо благи́мъ по́вѣсти ревнова́ти и подража́ти по си́лѣ, ели́кихъ же злы́хъ отбѣга́ти и при́сно къ Бо́гу востека́ти покая́ніемъ, слеза́ми, и исповѣ́даніемъ, и ины́мъ я́вѣ благоугожде́ніемъ.
Оба́че толи́ко е́сть широ́кій и сладкогла́сный, я́ко и саму́ жесточа́йшую ду́шу дово́ленъ умягчи́ти и къ бо́дрости благо́й воздви́гнути, а́ще то́чію съ сокруше́ннымъ се́рдцемъ и внима́ніемъ подо́бнымъ пое́тся.
Сотвори́ же сего́, егда́ и патріа́рхъ Іерусали́мскій вели́кій Софро́ній, еги́птяныни Марíи житіе́ списа́. Умиле́ніе бо и сіе́ житіе́ предлага́етъ безчи́сленно, и мно́гое прегрѣши́вшимъ и согрѣша́ющимъ утѣше́ніе дае́тъ, а́ще то́чію злы́хъ отступи́ти хотя́тъ...
Полный церковнославянский текст (Источник: Постная Триодь)
#Андрей #Критский #великий #канон #Триодь #синаксарь
