Машиналар йүнәтә, өйҙәр һала

Йылайыр районының Матрай ауылында йәшәүсе Урал Байғужин былтыр көҙ автосервис асҡан. Һөнәре буйынса водитель булған ир-егет был эш менән үҙмәшғүл булараҡ шөғөлләнә. Ул шулай уҡ ауылдаштарына такси хеҙмәте лә күрһәтә.

-Ни өсөн автосервис асырға булдыммы? Сөнки, хәҙер һәр өйҙә икешәр автомобиль бар. Техника боҙолмай тормай, уны йүнәтеү буйынса яҡын тирәлә сервистар юҡ. Берәү башлап ебәргәйне ул, әммә уны тап итеүе, эшләтеп алыуы бер бәлә. Шуға күрә, боҙоҡ машинаны йүнәтергә, хатта тәгәрмәсте балансировкалау өсөн дә йә Юлдыбайға, унда эшләй алмаһалар Баймаҡҡа, Сибайға алып барырға тура килә. Ошонан сығып уйландым да, тәүәкәлләнем,--ти Урал Сибәғәт улы.

Ҡулы эш белгән ир-егеттең автосервис асыу буйынса төҙөгән бизнес-планын Йылайыр районы хакимиәте башлығы Борис Мелкоедов хуплай һәм ул 350 мең һум күләмендә социаль адреслы ярҙам алыуға өлгәшә. Дәүләт ярҙамына үҙ аҡсаһын ҡушып шиномонтаж станогы, компрессор һатып ала. Бында резиналарҙы тиҙ һәм сифатлы итеп алмаштырырға, тәгәрмәстәрҙе балансировкаларға, тишек камераларҙы һәм шиналарҙы ямарға мөмкин. Дөйөм алғанда кузовты ремонтлауҙан тыш бөтә төр хеҙмәттәрҙе лә бер үҙе күрһәтә. Хужа автоэлектриканы ла яҡшы белә. Ҡыҫҡа ваҡыт эсендә уның автосервисы халыҡ араһында популярлыҡ яулап та өлгөргән. Уға эргә-тирәләге ауылдарҙан ғына түгел, хатта Хәйбулла районынан да машиналарын йүнәтергә алып киләләр. Матрайға яҡын ятҡан “Башҡорт баҡыры” йәмғиәте, Юбилейка ятҡылығы эшселәре лә боҙоҡ техникаларын алып килә.

Урал Байғужиндың СТО-һы шәхси йорто биләмәһендә урынлашҡан. Ике посҡа иҫәпләнгән ярым блоктан булған бинаны ул былтыр йәй эсендә күтәрә. Хатта уға төкәтеп мунса ла һалған.

-Уҙған йәйем бушҡа үтмәне: Юлдыбайҙа, Яманһаҙҙа ялланып ике йорт һалдым. Кис ҡайтып үҙемә СТО бинаһы төҙөнөм,--ти Урал Сибәғәт улы.-Ҡышҡа ҡарай эшләй башлағас бинаны йылытыу ҡоролмаһы—мейесте лә хәстәрләнем. Әлеге утын яғып йылытам, киләсәктә тәбиғи газ үткәрергә иҫәп тотам. Кешене ышандырып йүнәтәм тип әйткәс, төнө буйы эшләһәм эшләйем, ваҡытында өлгөртәм. Головка кеүек ҡатмарлы частәр боҙолһа, Баймаҡҡа үҙем тейәп алып барып йүнәттерттәм.

Ағас эшен дә, техниканы ла яҡшы белеүенең сере ниҙә булыуын һорағас, ул:

-Ир-егет белергә тейеш эштәргә атайым Сибәғәт Ғибатулла улы Байғужин өйрәтте. Ул техниканы яҡшы белде. Байғужа ауылында ЗИС-5 машинаһының беренсе водителе булды. Атайым һәм мин техниканы яҡшы белһәк, ағайҙарым барыһы ла балта эшенә лә оҫта,--тип яупланы.-Байғужала йәшәгән Эльмира апайыма күмәкләп ике ҡатлы йорт һалып инергә ярҙам иттек. Тырышҡанда барыһына ла өлгөрөргә була. Өй һалып аҡса эшләүе килемле шөғөл. Ә автосервисты мин халыҡ мәнфәғәтен ҡайғыртып астым. Унан килгән аҡса көн итеүгә етеп тора.

Байғужиндар Матрайға Байғужа ауылынан күсеп килә. Урал Сибәғәт улы 1975 йылда Матрайҙа тыуа. Ауыл мәктәбендә белем ала. Водитель һөнәрен Күгәрсен районының Мораҡ ауылы СПТУ-һында үҙләштерә. Тап ошо училищела автомобиль төҙөлөшөн яҡшы итеп өйрәтәләр. Унан егеткә Ватаны алдындағы убурысын үтәргә повестка килә. Урал Дондағы Ростов ҡалаһының хәрби часында һалдат мәктәбен үтә. Армиянан ҡайтҡас оҙаҡ йылдар Себер тарафтарында экскаваторҙа эшләй. 2019 йылдан ситкә йөрөмәй, тыуған яғында йәшәп мал таба. Кәләше—Лилиә Фаат ҡыҙы менән атай нигеҙендә йәшәй.

Яҡын арала Урал Сибәғәт улы икенсе посын эшләтеп ебәрергә хыяллана. Подъемник алып, автомобилдәрҙе күтәреп йүнәтеүҙе хәстәрләргә уйлай. Мунсаһын да урын еренә еткереп эшләп бөтөрөргә йыйына.