2026 çулхи март уйăхĕнче Чăваш Республикинчи Вĕрентÿ министерстви тата «Эткер» пултаруллă ачасемпе çамрăксен центрĕ йĕркеленипе И.Н. Ульянов ячĕллĕ Чăваш патшалăх университетĕнче чăваш чĕлхипе тата литературипе регионсем хушшинчи олимпиада иртнĕ.
Ăс-тăн ăмăртăвне Чăваш Республикинчи, Ульяновск облаçĕпе Пушкăртстан Республикинчи 9-11 классенче вĕренекен 109 ача хутшăннă.
Пушкăртстан Республикин чысне регионти чăваш чĕлхипе литература олимпиадинче мала тухнă Ксения Козлова хÿтĕленĕ. Тăрăшуллă хĕр ача Федоровка тăрăхĕнчи Урал ял шкулĕнче 9-мĕш класра вĕренет. Вăл олимпиадăн кăткăс ыйтăвĕсем çине хуравланă, чылай балл пухса лайăх результатсем кăтартнă. Эпир маттур вĕренекенпе унăн вĕрентекенне, Анастасия Федорована, черетлĕ çитĕнÿпе чунтан саламлатпăр, малашне те çĕнĕ çитĕнÿсем тума ăнăçу сунатпăр.
Регион шайĕнчи олимпиадăна хутшăнни Ксенийăшăн пурнăçăн пĕлтерĕшлĕ тапхăрĕ пулса тăнă. Асăннă çул çÿрев хĕр ачана çĕнĕ вăй-хал, опыт, паллашусем, тăван чĕлхене тата та юратса вĕренме хавхалануллă кăмăл парнеленĕ.
– Çак олимпида пирĕншĕн иксĕмĕршĕн те питĕ усăллă пулчĕ. Кирек епле ăмăрту та вăл хăвна хăв тĕрĕслени, тавракурăма анлăлатни. Çавăнпа та эпир пĕр шутласа тăмасăр çула пуçтарăнтăмăр. Ирхине ирех Ĕпхÿ хулине çитсе Ĕпхÿ-Мускав автобус çине лартăмăр. Шупашкара каçхи сакăр сехере çитрĕмĕр. Каç пулнине пăхмасăр пире ăшшăн кĕтсе илчĕç. «Эткер» центрăн общежитийĕнчи хăтлă пÿлĕмсенчен пĕрне вырнаçтарчĕç. Тепĕр кун ирпе олимпиадăна кайрăмăр. Шкул ачисем олимпиада заданийĕсене пурнăçланă вăхăтра Чăваш патшалăх университечĕн вырăс тата чăваш филологийĕпе журналистика факультечĕн деканĕ А.М. Иванова вĕрентекенсем валли «Филологи тата культурăсем хушшинчи коммуникаци: инновациллĕ вĕрентÿ практики» ăсталăх тĕпелĕ ирттерчĕ. Вăхăчĕ питĕ хĕсĕк пулсан та кăштах хула та курса çÿрерĕмĕр, – тет Анастасия Валерьевна.
А.В. Федорова – çамрăк вĕрентекен. Вăл ĔНТУн Çтерлĕри филиалĕнчи пушкăрт тата тĕрĕк филологийĕсен факультечĕн чăваш уйрăмĕнчен вĕренсе тухнă, иккĕмĕш çул тăван ялĕнче чăваш чĕлхипе литература, акăлчан чĕлхи предмечĕсене вĕрентет. Çамрăк та пултаруллă учителе ачасем те, ĕçтешĕсем те питĕ хисеплеççĕ.
Надежда РОДИОНОВА.
Федоровка районĕ, Урал ялĕ.