Өфөлә «Башҡортостан» концерт залында Ватанды һаҡлаусылар көнөнә арналған тантаналы сара үтте.
Саҡырылған ҡунаҡтар--Рәсәй Геройҙары, хәрбиҙәр, запастағы офицерҙар, һәләк булған Ватан геройҙарының туғандары, махсус хәрби операцияла ҡатнашыусылар араһында ҡыйыу яҡташыбыҙ Сәфәрғәлин Нурфәиз Рафиҡ улы бар ине. Республика Башлығы Радий Хәбиров сәләмләү һүҙендә бөтә Башҡортостан халҡы махсус хәрби операция барышында батырлыҡ күрһәткән яугирҙәр менән ғорурлана, тип билдәләне.
Сәфәрғәлин Нурфәиз Рафиҡ улы--күп бала атаһы, әүҙем йәмәғәт эшмәкәре, хәрби хәрәкәттәр ветераны, Төньяҡ Кавказда контртеррористик операцияла, шулай уҡ мобилизация буйынса махсус хәрби операцияла ҡатнаша. Баймаҡ районы Байым ауылында тыуған, ошонда мәктәп тамамлаған. Баймаҡ ауыл хужалығы колледжында электр-газ менән иретеп йәбештереүсе һөнәрен ала. Уҡыуын тамамлағандан һуң, Рәсәй Ҡораллы көстәре сафына хәрби хеҙмәткә саҡырыла. Новоссибирск ҡалаһына эләгә. Төньяҡ Кавказда контртеррористик операцияла ҡатнаша. 2002 йылда тыуған яҡтарына ҡайта һәм Сибай ҡалаһында “Строймеханизация” йәмғиәтендә эш башлай. Баймаҡ үҙәк дауаханаһында эшләгән Ишбирҙе ауылы һылыуы Илүзә Азат ҡыҙы менән ғаилә ҡора. Бәхетле ғаиләлә өс бала—Нәркәс, Илназ, Нургиз донъяға килә. Нәркәс Сибай медицина колледжын тамамлаған, Илназ музыка менән ҡыҙыҡһына, ҡурайҙа, гитарала уйнай. Нургиз спортты, айырыуса футболды ярата.
2022 йылда Нурфәиз Рафиҡ улы өлөшләтә мобилизацияға эләгә, Луганск һәм Донецк тарафтарында хәрби хәрәкәттәрҙә ҡатнаша. Күрһәткән батырлығы өсөн бик күп миҙал-билдәләргә лайыҡ була.
Нурфаиз Рафиҡ улы әүҙем тормош алып бара, батырлыҡ дәрестәрендә, район һәм ҡаланың бөтә патриотик сараларында ҡатнаша. Сәфәрғәлиндар ғаиләһе--ул күп балалы ғаилә генә түгел, ул мөхәббәт, батырлыҡ һәм тоғролоҡ гимны.
Әйткәндәй, Өфөлә үткән сарала Нурфәиз Рафиҡ улы "Камаз" позывнойлы рота командиры менән осрашҡан.