Сибай ҡалаһының күп профилле профессиональ колледжында буласаҡ тау сәнәғәте өлкәһе белгестәре өсөн яңы кабинеттар йыһазландырылды. Геология һәм маркшейдер эштәре кабинеттары «Бүребай тау-байыҡтырыу комбинаты» акционерҙар, «Башҡорт баҡыры» һәм «Шахта төҙөү идаралығы» яуаплылығы сикләнгән йәмғиәттәре кеүек эре стратегик партнерҙарҙың, шулай уҡ ВТБ банкыһының матди һәм финанс ярҙамы менән "Йәштәр һәм балалар" милли проектына ярашлы булдырылды.
Геология кабинетының ҡыҙыл таҫмаһын «Башҡорт баҡыры» яуаплылығы сикләнгән йәмғиәте директоры урынбаҫары Гринцов Виталий, «Шахта төҙөү идаралығы» йәмғиәтенең баш геологы Кулбаков Андриан һәм колледж уҡытыусыһы Кодакова Нелли Николаевна ҡырҡты. Педагог Людмила Йәнбирҙина геология тармағындағы эш тәжрибәһе менән уртаҡлашты һәм был йүнәлештең үҫеш перспективалары тураһында һөйләне.
«Геологик төшөрөү, файҙалы ҡаҙылмаларҙы эҙләү һәм разведкалау» специальносы буйынса белем алыусы ҡыҙҙар-егеттәр уҡыу процесында ҡулланылған заманса ҡорамалдарҙа эшләп күрһәтте. Улар практик дәрестә геологик тикшеренеүҙәр өсөн кәрәкле ҡорамалдар менән оҫта эш итеүҙәрен дә иҫбатланы.
Маркшейдер эштәре кабинетын асҡанда символик таҫманы «Башҡорт баҡыры» йәмғиәте маркшейдеры Антон Гусев һәм «Бүребай тау-байыҡтырыу комбинаты» акционерҙар йәмғиәтенең йәмәғәт менән бәйләнеш бүлеге начальнигы Самат Азаматов киҫте. Махсус дисциплиналар уҡытыусыһы Светлана Меньшенина маркшейдерҙың эш спецификаһы һәм был профессияның тау сәнәғәтендәге әһәмиәте тураһында һөйләне. Буласаҡ белгестәр производствола практика үтеү тәжрибәләре менән уртаҡлашты һәм ҡеүәтле ҡорамалдар менән эшләүҙәрен сағылдырған видеороликтар күрһәтте.
Колледж директоры Лундеж Байморатов билдәләүенсә, яңы уҡыу кабинеттары белем сифатын яҡшыртыуға һәм студенттарҙы заман талаптарына ярашлы яҡшы белгес итеп әҙерләүгә булышлыҡ итәсәк.
-Сибай күп профилле профессиональ колледжы менән күптән хеҙмәттәшлек итәбеҙ. Студенттар беҙҙә даими практика үтә. Маҡсатлы йүнәлтмә буйынса уҡыуға предприятиенан йәштәрҙе йүнәлтәбеҙ, финанс ярҙамы күрһәтәбеҙ. Әле асылған кабинеттарҙы йыһазландырыуға ла өлөш индерҙек,--тине «Башҡорт баҡыры» яуаплылығы сикләнгән йәмғиәте директоры урынбаҫары Виталий Гринцов.
-Кабинеттар ярайһы уҡ уңышлы килеп сыҡҡан. Был эштең башы ғына. Шуға күрә, әлегә улар бушыраҡ, киләсәктә яңы махсуслаштырылған ҡорамалдар менән һис шикһеҙ тулыланыр. Коллеждан юғары квалификациялы белгестәр сығып, беҙҙҙең тау сәнәғәте предприятиеһына эшкә килерҙәр тип көтәбеҙ,--тип йәштәрҙе дәртләндерҙе «Шахта төҙөү идаралығы» йәмғиәтенең баш геологы Андриан Кулбаков.
Осрашыу аҙағында мөһим сарала ҡатнашыусылар Урал аръяғы төбәгенең файҙалы ҡаҙылмалар табыу һәм эшкәртеү тармағына кадрҙар әҙерләүҙәге хеҙмәттәшлек оҙайлы дауам итеүенә ышаныс белдерҙе. Ни тиһәң дә, тау сәнәғәте беҙҙең данлы тарихыбыҙ, ошо өлкәлә уңышлы эшләүсе билдәле шәхестәребеҙ генә түгел, ул беҙҙең киләсәк тә. Сәнәғәт кампаниялары төбәк халҡының йәшәйешен яҡшыртыу, социаль объекттар төҙөү өсөн мөмкинлек тә бирә. Бигерәк тә ауыл ере өсөн бөгөнгө көндә иң ҙур проблема—эшһеҙлек. Республика етәкселеге, шуға ла инвесторҙарҙы йәлеп иткәндә тәү сиратта урындағы халыҡты эш менән тәьмин итеүселәргә өҫтөнлөк бирә.
Гөлдәр Ҡадаева.