МХОла батырҙарса һәләк булған Артур Ғиләжевтың әсәһе Әлфиә апай Ғиләжеваға арнала

МХОла батырҙарса һәләк булған Артур Ғиләжевтың әсәһе Әлфиә апай Ғиләжеваға арнала.

Герой партаһы

Әсә йәше тамды,

Тыпылданы,

Ябай ғына, ағас өҫтәлгә.

Кемдер ишетмәне тып! иткәнде,

(Тамсы йәшең бер тин– күптәргә).

Ер ярылған тауыш булды бит был!

Шаңдауҙары китте күктәргә!

Ул "шартлау"ҙы нисек еткерергә,

Ниндәйерәк һүҙҙәр өҫтәргә!?

"Герой партаһы"на тамған йәштән,

Ҡолаҡ тондо, донъя сайҡалды!

(Беҙҙең халыҡ ныҡ шул, сабыр инде),

Әсә– тора!

Донъя– саҡ ҡалды.

Бер тамсы йәш төшөп сәс(е) рәне,

Ялҡынынан йөрәк өтөлдө...

Ах! Был һуғыш! Бөтә ауыл менән,

Яҡшы хәбәр бит һуң көтөлдө...

Әсә йәше тамды.

Тыпылданы!

Туҡылданы!

Әллә шартланы!

Кемдер танау тартты... бышылданы...

Бала- саға шиғыр ятланы.

...Мәктәп тауын төшәм,

Һаман әле,

Зымбырлата уйҙар арҡаны.

Ҡысҡыраһым килә: онотмағыҙ!

Әсә йәше тамған партаны!

Ф. Сирбаев

Утыҙ йылдан ашыу мин шиғриәттең тоғро ҡоломон. Ун йыл БР яҙыусылар союзындамын. Үҙем ошо йәшкәсә физик эштәмен.

Шиғырҙар беренсе урында булһа ла, йырҙарҙы ла ташламайым. Вокал бүлегендә уҡығанда, уҡытыусым һайларға кәрәк һиңә, йә йыр, йә шиғыр тиһә лә...

Оло рәхмәт минең ижадым менән ҡыҙыҡһынған дуҫтарыма! Һеҙҙең ыңғай баһағыҙ миңә көс бирә, дәртләндерә. Әлбиттә, ышанысығыҙҙы аҡларға тырышырмын, Аллаһ бойорһа!

Һаталманым

Атты ла мин ҡаҙанманым,

Ҡаҙанманым һарыҡ та.

Башты эйеп баралманым,

Хәҙер ҡартмын, арыта.

Хужаларға табалманым

Йылы һүҙ, эҫе мунса.

Алдап маҡтай ҙа алманым,

Йыуынманым да ҡуша.

Тауҙарға мин меналманым,

Тайҙымы туфлиҙарым...

Йөрәк ҡушҡанса йәшәйем,

Бармы ни, шунан, зарым?

Зар түгел был, бары шиғыр,

Мин бары шағир ғына.

Башҡаса йәшәй белмәйем,

Башҡаса шағир тына.

Үҙ үҙемде һаталманым,

Ҡаҙанмаһам да атын.

Бизмәндәргә һалалманым

Ысын шағирҙың хаҡын.

Фәнис Сирбаев