Баймаҡ районы Ишбирҙе ауылында тыуып, Сәйғәфәр ауылында буй еткергән Айтуғанды бала сағында «Тимер малай» тип йөрөткәндәр. Был ҡушамат уға бәләкәйҙән техника янында уралған, 3-сө кластан ғына трактор йөрөткән өсөн бирелгән. Үҫә килә был исеме онотолған, ә техникаға һөйөүе һүрелмәгән.
Айтуған Ринат улы Юнысов сос, тилбер булып буй еткерә. Үгәй атаһы бар эшкә өйрәтә. Хатта тракторға ултырғанда аяҡтары педалгә лә етмәй уның.
—Совхоз гаражынан сығышманым, ниндәй генә тракторҙы йөрөтмәнем,— тип иҫкә ала бала сағын Айтуған.
Ауыл мәктәбендә 9-сы класты тамамлағас, Юлдыбайҙағы 80-се һөнәрселек лицейына бара һәм электрик, водитель һөнәрҙәрен үҙләштерә. Шунда үҙенең һөйгән йәре Нәркәсте осрата. Йылайыр районы Һултантимер ауылы ҡыҙы ашнаҡсыға уҡып йөрөгән була.
Йәштәр 2013 йылда өйләнешә. Әле улар Баймаҡ ҡалаһында йәшәй, йорт һалып сыҡҡандар. Нурлы өйҙәрен шау-шыуға һәм бәхеткә күмеп 5 бала үҫеп килә. Юлиә, Гөлиә, Айгиз мәктәп уҡыусыһы булһа, Айназ балалар баҡсаһына йөрөй. Ислам иһә быйыл ғына тыуған. Нәркәс сабый
менән өйҙә ултырһа, Айтуған Баймаҡ ҡалаһында урынлашҡан «Аҡбуҙат» техник хеҙмәтләндереү станцияһында автослесарь булып эшләй. Бөтә төр автомобилдәрҙе лә оҫта ремонтлаған егетте районда яҡшы беләләр, нәҡ уға эләгергә тырышалар.
—Бәләкәй саҡтан эш менән үҫтем, уйнап ултырырға ваҡытым да булманы. Йә гаражда тимер-томор араһында йөрөнөм, йә һарайҙы тиҙәктән таҙарттым. Башлыса техникаға әүрәп йөрөһәм дә йырсы булыу теләге бар ине. Шулай ҙа әсәй-атайым һөнәрселек лицейына уҡырға бирҙе. Үкенмәйем, эшем оҡшай. Автомобилдәрҙең торошона ҡарап төрлө арауыҡта ремонтлап бирәбеҙ. Ҡайһы саҡ көнөнә 5-6 машинаны рәтләп сығарһаҡ, ҡайһы саҡ бер автомобилгә ике көн китә,—ти тәжрибәле автослесарь.
Айтуғанды үҙ һөнәренең оҫтаһы тип кенә түгел, яҡшы ғаилә башлығы, хәстәрлекле атай итеп тә беләләр.
—Ҡустым менән ғорурланам. Бәләкәйҙән эш менән үҫкән туғанымды йәлләп тә ҡуя инем, әммә өйрәнгәне үҙенә булды. Бөгөн ул бер эштән дә ҡурҡмай, ир-егет эше, ҡатынҡыҙҙыҡы тип айырып ултырмай, мыжымай, тота ла эшләй. Киленгә, балаларға ла иғтибарлы. Һәр кемгә
ихлас, кешелекле, ихтирамлы, тыйнаҡ кеше ул. Күңелемә ауыр булһа уға барып һөйләшеп ултырһам, тынысланып ҡайтам,—ти Миләүшә апаһы.
Эше, ғаиләһе, холҡо менән дә абруй яулаған йәш ғаилә башлығы, биш бала атаһы, оҫта ҡуллы, йыр-моңға ғашиҡ автослесарға ныҡлы һаулыҡ һәм уңыштар теләйбеҙ!