Алтын туй - ғаилә тормошонда иң мөһим ваҡиғаларҙың береһе. 50 йыл бергә ғүмер иткәндәрҙең төп юлдашы мөхәббәт, ихтирам, ышаныс һәм бер-береңә тоғролоҡ. Ошо хәҡиҡәткә Яңауыл ауылында йәшәгән Әминә һәм Тимербулат Ғиззәтуллиндар менән аралашҡандан һуң тағы бер ҡат инандым.
Тормош һынауҙарына бирешмәгән был парҙың татыулыҡ сере тураһында бүлешеүҙәрен һораным. “Тормош юлынан һәр кем үҙенсә үтә, бында әҙер һуҡмаҡ юҡ. Бер-береңә тоғролоҡ шарт. Икенсенән, яҡшы уйҙа булыу, йылмайып бағыу, ихтирам, ике яҡлап та туғандарҙы хөрмәт итеү ҙә мөһим. Донъябыҙҙы бөртөкләп, үҙ көсөбөҙ менән тупланыҡ. Шуға ла унда йәшәлгән һәр көн матур хәтирәләре менән күңелде йылыта “, - тине алтын туйҙарын билдәләүсе Әминә һәм Тимербулат Ғиззәтуллиндар. Ярты быуат элек яралған мөхәббәт тарихы бына шулай иҫтәлекле лә, ҡыҙыҡлы ла, һоҡландырғыс та. Бик һирәктәргә генә эләгәлер бындай бәхет. 50 йыл Аллаһы Тәғәлә тарафынан бүләк ителгән мөхәббәттәренә тоғро ҡалған бәхетле пар шундайҙарҙың береһе.
Ауылдың өлгөлө ғаиләһенә юлыбыҙ ерҙең иркәләп кенә ап-аҡ ҡарға төрөнгән мәлендә төштө. 12 декабрь улар өсөн иҫтәлекле көн -теүәл 50 йыл элек тирә-йүндә күптәргә өлгө булырҙай ғаиләгә нигеҙ һалына. Уларҙың мөхәббәт тарихы күптәрҙекенә оҡшаш. Элек йәштәр колхоз эшенән нисек кенә арыһалар ҙа, киске уйынға йөрөп, бер-береһе менән аралашҡан. Яңы дуҫтар табылған, ғашиҡ йәндәр ошондай уйындарҙа мәңге булырға вәғәҙә бирешкән.
Армиянан ҡайтҡан Тимербулат ағайҙың хеҙмәт юлы тыуған ауылында күмәк хужалыҡта башлана. Төн уртаһына тиклем дауам иткән колхоз йыйылышынан һуң йәштәр күрше ауылға йыйына. Ауылдың иң сибәр ҡыҙы Әминәгә күҙе төшөп йөрөгән мәле була егеттең. Аҡыллы, эшһөйәрҙе бер күреүҙән: “Был ҡыҙ минең ғүмерлек юлдашым буласаҡ”, тип уйлай. Артабан йәштәр араһында мөхәббәт хисе уяна. Мажаралы, бөгөн күңелгә йылылыҡ өҫтәр осрашыуҙарҙан һуң йыһанды аҡлыҡҡа, сафлыҡҡа төргән ҡыш айында Тимербай ағай менән Әминә апай ғаилә ҡороп, бер һуҡмаҡтан атлай башлай.
Ҡайны-ҡәйнәле йортҡа төшкән килен үҙенең тыныслығы, сабырлығы менән алдыра. Ҡайҙа ғына эшләһә лә, ауылдаштары уны йылы һүҙле, туған йәнле булғаны өсөн ярата. Күп йылдар колхозда төрлө эш башҡарып, һынатмайынса хаҡлы ялға сыға. Аш-һыуға оҫта Әминә Ғәббәс ҡыҙының тәмле ризыҡтары биләмәлә үткән сараларҙа табын биҙәге.
Тимербулат Миңлеғәли улы ла бөтә ғүмерен тыуған колхозына бағышлай. Алдынғы механизаторҙың тырыш хеҙмәте тиҫтәләгән Маҡтау ҡағыҙы менән билдәләнгән. Шулар араһында “Хеҙмәт ҡаҙаныштары өсөн”, “РФ хеҙмәт ветераны” тигәндәре бигерәк тә ҡәҙерле. Тимербулат ағайҙы ауылдаштары оҙаҡ йылдар ауыл советына депутат итеп һайлай, заманында әүҙем партия ағзаһы ла була.
Алдынғы механизатор сөгөлдөр сәсеү буйынса белем камиллаштырыу буйынса уҡыуҙа ҡатнаша, ҡоролоҡ йылдарында Украина тарафынан һалам ташый. Йыраҡ юлдар уларҙың мөнәсәбәттәрен тағы ла нығыта. Ике ҡыҙға ғүмер бүләк итеп, оло тормош юлына баҫтыралар. Бөгөн Нурсилә һәм Лилиә ҡыҙҙары, ейәнсәрҙәре форсаты сыҡҡан һайын ҡайтып яҡындарына ҡәҙер-хөрмәт күрһәтә.
Ғиззәтуллиндар балаларында туғанлыҡ, үҙаллылыҡ хисе тәрбиәләүгә күп көс һалған. Бөгөн был йорттағы байрам-осрашыуҙарҙа ейән-ейәнсәрҙәр көтөп алынған хөрмәтле ҡунаҡ.
Тормош һынауҙарына бирешмәгән был парҙың татыулыҡ сере тураһында бүлешеүҙәрен һораным. “Тормош юлынан һәр кем үҙенсә үтә, бында әҙер һуҡмаҡ юҡ. Бер-береңә тоғро булыу шарт. Икенсенән, яҡшы уйҙа булыу, йылмайып бағыу, ихтирам, ике яҡлап та туғандарҙы хөрмәт итеү ҙә мөһим. Донъябыҙҙы бөртөкләп, үҙ көсөбөҙ менән тупланыҡ. Шуға ла унда йәшәлгән һәр көн матур хәтирәләре менән күңелде йылыта “, - тине алтын туйҙарын билдәләүсе Әминә һәм Тимербулат Ғиззәтуллиндар.
Ярты быуат элек яралған мөхәббәт тарихы бына шулай иҫтәлекле лә, ҡыҙыҡлы ла, һоҡландырғыс та. Бик һирәктәргә генә эләгәлер бындай бәхет. 50 йыл Аллаһы Тәғәлә тарафынан бүләк ителгән мөхәббәттәренә тоғро ҡалған Ғиззәтуллиндар шундайҙарҙың береһе.