«Азамат-2025» Пушкăртстанри халăхсен искусствисен ачасемпе çамрăксен фестивалĕ 2025 çулхи декабрь уйăхĕн 2-мĕшĕнче «Атайсал» республикăри халăх пултарулăхĕн центрĕнче иртрĕ. Ăна «Дуслык» Тĕрĕк халăхĕсен этнокультура центрĕ, Ĕпхÿри чăваш наци культура автономийĕ, «Раççей халăхĕсен ассамблейи» регионти организаци йĕркелерĕç.
Фестивале Пушкăртстанри 16 тĕрлĕ халăхăн 280 çамрăкпа ачи (вырăссемпе пушкăртсем, тутарсемпе чăвашсем, марисемпе армянсем, поляксемпе нимĕçсем, еврейсемпе узбексем, аварсемпе таджиксем, туркменсемпе кăркăссем, латышсем тата ыт. те) хутшăнчĕ.
Кăçал «Азамат-2025» ачасемпе çамрăксен фестивалĕ вун виççĕмĕш хут иртрĕ. Ăна ачасемпе çамрăксенче наци хушшинчи килĕшĕве, туслăха çирĕплетес, ытти халăх культурисене хисеплеме вĕрентес, пултаруллă ачасене тупса палăртас тĕллевпе ирттереççĕ.
Раççейре кăçалхи çула Тăван çĕршыва хÿтĕлекенсене халалланă май мероприяти Анора Султанова таджик юрăçи «Раççей» юрă юрланипе, «Дуслык» тĕрĕк халăхĕсен ача-пăча этнокультура центрне çÿрекен Александра Купцова Борис Васильев çырнă произведенийĕн сыпăкне вуланипе пуçланчĕ.
Фестивале Ĕпхÿ хулин обществăлла палатин, Халăхсен туслăх çурчĕн, ПР Наци культурисен центрĕсен, Ĕпхÿ хулинчи наци вĕрентĕвĕн тата хушма пĕлÿ паракан учрежденисен ертÿçисем хутшăнчĕç.
Конкурса тăратнă номерсене 12 номинаци тăрăх хакларĕç. «Инструментпа каласси» (ансамбль) номинацире кĕçĕн ÿсĕмрисен хушшинче Ĕпхÿри «Дуслык» Тĕрĕк халăхĕсен этнокультура центрĕн «Шух кашăкçăсем» («Озорные ложкари») чăваш кĕввине каласа çĕнтерÿçĕ пулса тăчĕç. Пелепей хулинчи 8№ шкулта вĕренекен, «Урал-Батыр» наци культурисен центрĕнчи «Эксперимент» вокал студине çÿрекен чăваш ачи Андрей Сидоров кĕçĕн ÿсĕмрисен хушшинче «Вокал» номинацинче уйрăм юрлассипе мала тухрĕ.Вăл «Вдоль по Питерской» вырăс халăх юррине юрларĕ. ПР«Раççей халăхĕсен ассамблейин» председателĕ Гульнур Кульсарина ăна ятарлă парне пачĕ.
Малашне те иртекен фестивальсемпе конкурссене наци шкулĕсенчен, хушма пĕлÿ паракан организацисенчен чăваш ачисемпе çамрăкĕсем хастартарах хутшăнасса, çак ĕçре вĕсене вĕрентекенĕсемпе наставникĕсем пулăшасса, ачасем хăйсен культура пуянлăхне тивĕçлипе кăтартасса шанса тăратăп. Çак шухăша палăртма мана кăçалхи конкурсра чăваш ачисемпе çамрăкĕсем тата ушкăнсем сахал пулни хистерĕ. Çитес çулхи конкурс программине чăваш юрри-кĕвви, ташă çаврăмĕсем ытларах илем кÿччĕр.
Полина ДЕМЧЕНКО, «Дуслык» этнокультура центрĕн директорĕ.
Ĕпхÿ хули.