«Сая ҡыҙҙар» этно-коллекцияһы Гран-при яуланы!
5 - 7 декабрҙә Екатеринбургта "Кит" абруйлы ижади проекты сиктәрендә "Край любимый сердцу снится" исемле Халыҡ-ара күп жанрлы конкурс үтте. Күп һанлы номинацияларҙың һәр береһендә иң яҡшылар исеменә 200-гә яҡын кеше дәғүә итеп, юғары оҫталыҡ кимәлен күрһәтте. Аҡъяр балалар ижады йортоноң «Модалы дизайн» берләшмәһе уҡыусылары айырыуса сағыу балҡып, йәш дизайнерҙар үҙҙәренең «Сая ҡыҙҙар» этно-коллекцияһы менән конкурстың юғары наградаһы – Гран-при яулауға өлгәште!
Жюри йәш дизайнерҙарҙың ижады менән дә айырыуса ҡыҙыҡһына. Конкурс программаһы тамамланғандан һуң коллектив коллекцияны ентекләберәк ҡарау өсөн махсус саҡырыла, был юғары кимәлдәге башҡарыуҙың һирәк һәм әһәмиәтле күрһәткесе булып тора.
Был еңеү «Модалы дизайн» берекмәһе етәксеһе Римма Ишкилдинаның тынғыһыҙ хеҙмәт емеше.
Йәш дизайнерҙар жюри хөкөмөнә «Сая ҡыҙҙар» коллекцияһын тәҡдим итте.
Римма Хөснулла ҡыҙы балаларҙы ҡул эшенә генә өйрәтмәй, ә дефиле, сәхнә образы тыуҙырыу өҫтөндә лә эшләй.
