Рәсәй-Үзбәкстан ведомство-ара хөкүмәт комиссияһы ултырышында Үзбәкстан һәм Башҡортостан төбәктәре араһында хеҙмәттәшлекте үҫтереү буйынса юл картаһына ҡул ҡуйылды. Был турала Башҡортостан Башлығы хакимиәтенең матбуғат хеҙмәтендә хәбәр иттеләр.
Фото: матбуғат хеҙмәте / Башҡортостан Республикаһы Башлығы хакимиәте
Бөгөн Ташкентта Башҡортостан Башлығы Радий Хәбиров Үзбәкстан менән Рәсәй араһында иҡтисади хеҙмәттәшлек буйынса хөкүмәт-ара комиссияның 26-сы ултырышында ҡатнашты. Уны Рәсәй хөкүмәте рәйесенең беренсе урынбаҫары Денис Мантуров һәм Үзбәкстан премьер-министры урынбаҫары Жамшид Ходжаев үткәрҙе.
Ултырышта билдәләүҙәренсә, 2024 йылда Рәсәй менән Үзбәкстан араһында тауар әйләнеше биш проценттан ашыуға артҡан, 10 миллиард долларҙан күберәк. 2025 йылдың туғыҙ айында үҙ-ара сауҙа күләме тағы ла һигеҙ процентҡа артҡан. Экспорт һәм импорт тауарҙары ыңғай динамика күрһәтә.
«Илебеҙҙең инвестиция хеҙмәттәшлеге лә ошондай ыңғай йүнәлештә үҫешә. Республикала Рәсәй ҡатнашлығындағы 3 меңдән ашыу предприятие эшләй, был иһә Үзбәкстандағы сит ил капиталы булған бөтә компанияларҙың 20 проценты самаһы», — тине Денис Мантуров.
Мөһим мәл. Мәҙәни-гуманитар бәйләнештәрҙе үҫтереү, берлектәге конгресс-күргәҙмә сараларын үткәреү ике ил араһында төрлө яҡлы хеҙмәттәшлекте нығытыуға булышлыҡ итә.
Ултырыш йомғаҡтары буйынса Жамшид Ходжаев һәм Радий Хәбиров Үзбәкстан һәм Башҡортостан төбәктәре араһында сауҙа-иҡтисади хеҙмәттәшлекте үҫтереү буйынса юл картаһына ҡул ҡуйҙы. Ул сәнәғәт кооперацияһы һәм инвестиция сәйәсәте, агросәнәғәт комплексы, сауҙа, туризм, мәғариф, мәҙәниәт, спорт өлкәләрендә һәм башҡа йүнәлештәр буйынса үҙ-ара эш итеүҙе киңәйтеүҙе күҙ уңында тота.
Әйткәндәй, Үзбәкстан әле Башҡортостандың тышҡы сауҙа әйләнешендә 4,2 процент өлөш менән етенсе урынды биләй. Уҙған йыл йомғаҡтары буйынса ул 16,7 процент үҫеш менән 197,9 миллион долларға еткән.
Автор: Галина Бахшиева