Ноябрь уйăхĕн 16-мĕшĕнче аслă Çеçпĕлĕмĕр çуралнă кун, Чăваш Республикинчи Çеçпĕл Мишши фончĕн Халăхсем хушшинчи Çеçпĕл Мишши ячĕллĕ премийĕн 2025 çулхи лауреачĕсем паллă пулчĕç.
Вĕсем – Чăваш патшалăх культурăпа ÿнер институчĕн гуманитари кафедрин профессорĕ, истори наукисен докторĕ Ирина Витальевна Сухарева-Саригель («Чăвашлăха аталантарассишĕн нумай çул çине тăрса тухăçлă ĕçленĕшĕн, наукăра, юрă-кĕвĕ ÿнерĕнче пысăк çитĕнÿсем тунăшăн») тата Санкт-Петербургри Чăвашсен наципе культура автономийĕн председателĕ, Чăваш Республикин культура тава тивĕçлĕ ĕçченĕ Валериан Анатольевич Гаврилов («Чăвашлăха аталантарас тĕлĕшпе нумай çул тухăçлă ĕçленĕшĕн, тĕрлĕ çулсенче Мурманск облаçĕнче тата Санкт-Петербургри чăвашсен пĕрлĕхĕсене ăнăçлă ертсе пынăшăн»).
И.В. Сухарева Пушкăртстанри Авăркас районĕнчи Нукасак ялĕнче çуралса ÿснĕ. Пушкăрт патшалăх университетĕнче истори факультетĕнчен тата аспирантурăран вĕренсе тухнă. 2004 çулта кандидат «Пушкăртстанри чăвашсен социаллă тата экономика аталанăвĕ (XVII-XIX ĕмĕрсем)», 2013 çулта «Пушкăртстанри чăвашсем: историпе культура аталанăвĕ XVIII-XX ĕмĕр пуçламăшĕ» доктор диссертацийĕсене хÿтĕленĕ. Вăл пилĕк чĕлхе пĕлет. Студентсем валли занятисене вырăс тата акăлчан чĕлхисемпе ирттерет. 2025 çулхи март уйăхĕн 18-мĕшĕнче ăна «ПР тава тивĕçлĕ культура ĕçченĕ» сумлă ята парса чысланă. Çавăн пекех вăл Мускаври патшалăх искусство университетĕнчи музыка факультетĕнчен вĕренсе тухнă. Юрăсем çырать, кĕвĕлет, хăех юрлать. Хальхи вăхăтра Шупашкарта пурăнать, Чăваш патшалăх культурăпа ÿнер университетĕнче вăй хурать.
В.А. Гаврилов 1960 çулта Чăваш Республикинчи Вăрмар районĕнчи Пысăк Енкасси ялĕнче тĕнчене килнĕ, нумай çул Мурманскра ĕçлесе пурăннă, юлашки çулсенче Санкт-Петербургра пурăнать, Чăваш Енпе тачă çыхăну тытать.
Ирина Витальевнăпа Валериан Анатольевича сумлă премие илме тивĕçнĕ ятпа ăшшăн саламласа малашне те çĕнĕ çитĕнÿсем тума сунатпăр.
Надежда РОДИОНОВА.