Ойоштороу һәләтенә эйә ҡыҙ мәктәпте яҡшы билдәләренә тамамлаһа ла, уҡытыусы булыу хыялы бойомға ашмай. Тормошта осраған беренсе ҡаршылыҡҡа баш эймәй, төрлө урындарҙа эшләй һәм хеҙмәттәштәре араһында үҙенең тырышлығы менән айырыла. Мәжит Ғафури исемендәге колхоздың көслө йылдары була был осор. Ауылда ла йәштәр күп, улар менән төрлө саралар уҙғарырға, агитбригада ойошторорға ла кәрәк. Йыр-моңға маһир йәш ҡыҙҙы колхоз етәкселеге клубҡа художество етәксеһе итеп тәғәйенләй. Ғүмеренең был осоро сағыу хәтирәләр менән бәйле Мөкәрәмә апайҙың. Ауылдашы Таһир Ғәйфулла улы менән ҡауышып, ғаилә ҡоралар. Таһир ағай мал һимертеү комплексында эшләй, Мөкәрәмә апай хеҙмәт йылдарын почта хеҙмәтенә арнай.
Ожмахҡа ла, тамуҡҡа ла намыҫ күперенән башҡа күсеп булмай
Мәҡәләбеҙ геройы 27 йыл Ҡотош ауылы почта бүлексәһе начальнигы вазифаһын башҡара. Халыҡ күп, гәзит- журналдарҙы күпләп яҙҙыра, магазин кәштәһендә булмаған тауарҙы яҙҙырып ала, почтальон сумкаһына ваҡытлы матбуғат продукцияһы һыймаған йылдарҙа етәкләй ул бүлексәне. Намыҫлы хеҙмәте күп төрлө Маҡтау грамоталары, Рәхмәт хаттары менән билдәләнә.
- 16 йыл ҡәйнә менән татыу йәшәнем. Мин хөкүмәт эшенән бушай алмағанда әсәйем менән ҡәйнәм төп ярҙамсыларым булды, - тип хәтерләй ул.
Хәтер һандығына һаҡһыҙ ҡағылыу ғына кәрәк, хәтирәләр ебе үҙенән үҙе тағатыла.
- Был йорттоң кирбесен берәмләп эштән һуң үҙебеҙ һалдыҡ, килен булып төшкән йорт бәләкәй, һалҡын, тығын ине. Илнур улым шунда донъяға килде, атаһы бала иркен йортта үҫһен тип төндәрен йоҡламай тырышты, Илнурыбыҙға 2 ай тигәндә үҙ йортобоҙға күстек. Бәләкәйҙән бигерәк тыныс булды, бер иламаны балам. Ильвира ҡыҙыбыҙ, Илдар улыбыҙ ҙа ошо нигеҙҙә үҫте. Ҡустыһын, һеңлеһен гел ҡурсылап йөрөтөр ине.
Ил алдындағы бурыс ата- әсә алдындағы бурыс һымаҡ
Балалар атаһының вафатын ауыр кисерҙе. “Хәҙер ни эшләрбеҙ инде, тип Илнур бигерәк бөтөрөндө. –Ярай әсәй көймә, бирешмәбеҙ”, - тип тынысландырыр ине беҙҙе.
Мәктәпте тамамлағас Мәләүездә уҡыны. Иңендә беҙҙең өсөн ҙур яуаплылыҡ тойғандыр инде - Мәскәүҙә лә, Себерҙә лә эшләне. Махсус операция башланғас “Тыуған илде һаҡларға кәрәк, мине ебәр әсәй, ризалығыңды бир”- тип теленән төшөрмәне. Әсәй булараҡ гел туҡтатып килдем. Яҙғыһын ныҡлап хәл итте. 14 март контракт хеҙмәткә документтар йыйып, 19 мартта оҙаттыҡ. Шылтыратҡан һайын: “Барыбер ҡайтам, көтөгөҙ!,-тип тынысландырҙы. Август аҙағында ҡустыһына шылтыратып һуғышҡа инәбеҙ, әсәйгә әйтмәгеҙ, сыҡҡас үҙем бәйләнешкә сығам, тигән.
Шылтыратыу булмағас, йөрәгемде усыма тотоп, бер нисә тапҡыр комиссариатҡа барҙым. Унда ла, тынысландыра ла ҡайтаралар. Тыуған көнөмә мотлаҡ ҡайтам ти ине, шул көнгә миңә сюрприз эшләргә теләйҙер, бәлки, тип, өмөтләнеп көттөм. 9 ноябрҙә уның һәләк булыуы тураһында әйттеләр. Бала ҡайғыһынан да ауыры юҡ.
Был ҡайғыны юйыу, онотоу мөмкин дә түгел, ни эшләйһең инде, - тип үҙен дә, башҡаларҙы ла тынысландырырға теләгән яугир әсәһенә ҡушылып беҙ ҙә донъябыҙға тыныслыҡ урынлашып, тик изге хәбәр ишетеп йәшәргә яҙһын, тип теләйбеҙ.
Автор:Рафиля Сибагатуллина