Пишпÿлек районĕнчи черетлĕ «Кĕр сăри» йăла-йĕрке уявĕ сумлă хăнасене кĕтсе илнинчен пуçланчĕ. Вăл октябрь уйăхĕн 24-мĕшĕнче яланхи пекех райоти Тĕп культура çуртĕнче иртрĕ, çак тăрăхри мĕнпур чăваш ялĕсенче пурăнакан йăхташсене пуçтарчĕ.
– Вун тăватă тĕрлĕ чăваш сăрине астивсе пăхнă хыççăн хăшĕн тутлăрах пулнине уйăрса илме питĕ те йывăр пулчĕ. Анчах та кашни ăста çак ĕçе (сăра вĕретессине) чунне парса туни сисĕнет, ахăртнех, кашнинех хăйĕн авалтан килекен рецепчĕ пур пулмалла. Иртнине паянхи кунпа çыхăнтарни çакăнта та палăрать. Çакă ырă пулăм, – терĕ район администраци пуçлăхĕ Артур Зарипов «Чăваш сăри» конкурса хутшăннисен ĕçне хак панă май.
Вăлах кĕске сăмах каласа «Кĕр сăри» уявне уçрĕ, пултаруллă чăваш хастарĕсене Ольга Иванована, Людмила Романована тата Римма Андреевана Тав çырăвĕсем парса чысларĕ. Çав вăхăтрах ялсенчен килнĕ делегаци ертÿçисем çут çанталăка, çÿлти Турра кĕр мăнтăрĕшĕн тав туса ăшă сăмахсем каларĕç.
Ун хыççăн хăнасем кашни ялăн тулли те пуян уяв сĕтелĕсене хак пачĕç. Пурĕ вун икĕ сĕтел хатĕрленĕ. Çавăпа та пурне те пăхса çаврăнма, сĕтел çинчи апат-çимĕçпе ĕçмесене астивсе пăхма чылай вăхăт кирлĕ пулчĕ. Кашни сĕтел юрă-такмакпа та шăрттан тултармăшпа, икерчĕ хуплупа, йăва пÿремечпе, кăчăртатса тăракан тăварланă кăрăç кăмпипе кĕтсе илчĕ. Паллах, пур çĕрте те чăвашăн кăпăклă сăри малти вырăнта тăчĕ. Кĕскен каласан, ылтăн кĕркуннен пуянлăхне шăпах çак самантра хак пама май пулчĕ.
Пĕрремĕш кĕрекене ситекпуçсем хатĕрленĕ. Унпа Инна Никифорова ертÿçĕпе «Тăванлăх» ансамбль паллаштарчĕ. Кунтах черетпе хушăлкасемпе кистенлĕсене, пăслăксемпе çирĕклĕсене, ситексемпе ăхпуçсене, мелевĕспуçсемпе кистенлĕпуçсене, Семенов-Кудряшовсен çемйине курма пулчĕ. Районти чăвашсен Канашĕн хастарĕсем те уйрăм сăйламалли сĕтел хатĕрленĕ.
Кăçалхи «Кĕр сăри» уявĕн программине кÿршĕллĕ Эрĕнпур облаçĕнчи Абдулино районĕнчи Анат Кăрминчен килнĕ ансамбль (ертÿçи – Надежда Сафронова) хастарĕсем пуянлатнине палăртмалла. Вĕсем пултарулăхне йĕркелÿ комитечĕ Диплом тата парне парса хакларĕ.
Маларах эпир вун тăватă тĕрлĕ сăра вĕретни пирки сăмах хускатнăччĕ. Уява пухăннисем ăна кашниех астивсе пахнă хыççăн йĕркелÿçĕсем салатса панă жетонпа (ăна вăл е ку сăрашăн сасăламалли ещĕке ярса) хак пама пултарчĕç. Шутлав комиссийĕн хăш сăрашăн миçе çын сасăланине шутласси çеç юлчĕ.
Çапла вара чи лайăх сăра ăсти иртнĕ çулхи пекех Пăслăкри Лариса Исаева пулса тăчĕ. Вĕсем Пишпÿлек районĕнчи чăвашсен Канашĕн ертÿçин Сергей Михайловăн аллинчен çĕнтерÿçĕ Дипломне тата хаклă парнене тивĕçрĕç, наградăна илме халăх умне çемйипех тухрĕç. Куракансем вĕсене тăвăллăн алă çупса саламларĕç. Иккĕмĕшпе виççĕмĕш вырăнсене Кистенлĕри Валентина Полищукпа Пишпÿлек салинчи Анастасия Исаева пайларĕç.
«Кĕр сăри» чăваш халăхĕн йăли-йĕркипе çыхăннă авалтан килекен тулăх пурнăç уявĕ пулнă, малашне те пулĕ. Пишпÿлекри уява вĕçленĕ май вырăнти чăвашсен Канашĕн ертÿçи Сергей Михайлов пĕтĕмлетсе çапла каларĕ: «Кĕрхи ĕçсем вĕçленчĕç. Тырри-пулли туй тума та, ача-пăчаллă пулма та çитет. Çăкăр тени çулран çул çитсе пынă. Малашне те çаплах пуласса шанас килет».
Çак сăмахсем çумне хушса каламалли çук пулĕ тетĕп. Апла пулсан кĕр мăнтăрĕпе уявсем ирттерме те юрать.
Юрий МИХАЙЛОВ.
Пишпÿлек районĕ.