16 кастрычніка 1896 года ў Гродне памерла Марыя Багдановіч, маці будучага класіка беларускай літаратуры Максіма Багдановіча.
Марыя пабралася шлюбам з Адамам Багдановічам, бацькам паэта, калі ёй было 19 гадоў.
Адам Багдановіч так узгадваў сваю жонку:
«Незвычайная жвавасць успрымання, пачуцця і рухаў была асноўнай, выбітнай рысай яе натуры. Рухомая, заўсёды вясёлая, з іскрыстымі вачыма, з касой жахлівай велічыні, яна ў дадатак валодала грацыяй кацяняці... Яе карткі не даюць ніякага паняцця не толькі пра яе духоўнае аблічча, але нават і пра знешняе. Гэта — маска, пазбаўленая жыцця, а яна была ўся зіхоткая, пяючая жыццё, уся рух, радасць, захапленне».
Марыя Багдановіч спрабавала выкарыстоўваць фробелеўскую сістэму для выхавання пачуццяў у дзяцей. Аднак тыя перад развіваючымі цацкамі аддавалі перавагу простым жывым зносінам.
Праз месяц пасля нараджэння дачкі ў Марыі Багдановіч былі выяўлены сухоты. Лячэнне не дапамагло, і 16 кастрычніка 1896 года яна памерла.
Пахавалі Марыю Багдановіч на Гродзенскіх праваслаўных могілках на вуліцы Антонава. Першапачаткова там стаяў дубовы крыж. Пазней на магіле ўсталявалі сучасны помнік — палову гранітнага валуна, з выбітым на ім крыжом Еўфрасінні Полацкай.
Памяць Марыі Багдановіч ушаноўваюць у Горадні:
На 125-годдзе са дня нараджэння паэта ў 2016 годзе на магіле служылі памінальную службу на спачын душ паэта і яго бацькоў.
На 100-годдзе са дня смерці паэта ў 2017 годзе каля магілы яго маці маліліся гарадзенскія святары, а памяць ушанавалі беларускія паэты Данута Бічэль і Алесь Чобат.
Паводле ўспамінаў Адама Багдановіча, Максім Багдановіч знешнімі рысамі (хадой, манерай сябе трымаць, жэстамі) быў больш падобны да бацькі. Аднак па складзе характару — мяккага, жаноцкага, па весялосці нораву, жвавасці, сіле ўяўлення і пластычнасці творчасці — паэт найбольш нагадваў сваю маці.
На фота: Максім Багдановіч з маці Марыяй.
📸 Калі вас цікавіць гісторыя Гродна – падпішыцеся таксама на наш Instagram
🎥 Больш гісторый пра Гродна – на YouTube
☕️ Падтрымайце наш праект фінансава і дапамажыце папулярызаваць гісторыю горада: https://www.buymeacoffee.com/hrodna1127
